რუსთავი 2-ის გენერალურმა დირექტორმა, ნიკა გვარამიამ საგანგებო ბრიფინგზე განაცხადა, რომ რამდენიმე საათის წინ ტელეკომპანიისთვის კონფიდენციალური წყაროსგან ცნობილი გახდა, რომ რუსთავი 2-ის საქმის ერთ-ერთი მოსამართლე, ნათია გუჯაბიძე თაღლითობაშია შემჩნეული და მის მიმართ პროკურატურა სწორედ ამ ბერკეტის გამოყენებით ახდენს ზეწოლას:

"საქმე იმაშია, რომ 2014 წელს მას სახელმწიფომ გამოუყო სახსრები იმიტომ, რომ მან განაცხადა, არ ჰქონდა საცხოვრებელი სახლი თბილისში და სამოსამართლეო უფლება-მოსილების განხორციელებისთვის სჭირდებოდა ანაზღაურება, რაც მიღებული პრაქტიკაა. აღმოჩნდა, რომ მას ეს სახლი ჰქონდა და ბინას ქირაობდა საკუთარი დედისგან, შესაბამისად ის ითვისებდა აღნიშნულ თანხებს უკანონოდ".

გვარამიას ინფორმაციით, აღნიშნული ცნობილი გახდა იუსტიციის საბჭოსთვის, რის შემდეგაც საბჭომ ფაქტზე მოკვლევა დაიწყო. მისი თქმით, მაშინდელმა იუსტიციის საბჭოს ხელმძღვანელმა და უზენაესი სასამართლოს თავმჯდომარემ მოითხოვა საქმის პროკურატურაში გადაცემა, თუმცა ახალდანიშნულმა იუსტიციის საბჭოს წევრებმა ამას მხარი არ დაუჭირეს, რადგან გუჯაბიძე წულუკიანის გუნდთან ასოცირდებოდა:

"ძაღლმა ძაღლის ტყავი არ დახია. უფრო მეტიც, არათუ პრკურატურაში გადაგზავნაზე ეთქვათ უარი, არამედ სადისციპლინო დევნის ნაწილშიც უარი ითქვა და სადისციპლინო კოლეგიას არ გადაეგზავნა ეს საქმე, როგორც სამოსამართლეო ეთიკის დარღვევაც კი. ნათია გუჯაბიძეს აკმარეს მხოლოდ სარეკომენდაციო ბარათი, რითიც დგინდება, რომ დადასტურებულად ჩაითვალა ის ფაქტები, რომ ქალბატონი გუჯაბიძე, როგორც მინიმუმ ცრუობდა და სამართლებრივად თუ ვიტყვი, თაღლითობდა და ფლანგავდა სახელმწიფო ქონებას".