კონსტიტუციის პროექტის შესახებ 93 არასამთავრობო ორგანიზაცია ვენეციის კომისიას მიმართავს. ხელმომწერი არასამთავრობო ორგანიზაციები საქართველოს კონსტიტუციის პროექტში საპარლამენტო არჩევნებთან დაკავშირებით დანახულ ხარვეზის შესახებ საუბრობენ.

"წარმოდგენილი წესით ირღვევა სამართლიანი არჩევნების ძირითადი პრინციპი - თანასწორობის პრინციპი," - მიიჩნევენ არასამთავრობო ორგანიზაციები.

არასამთავრობო ორგანიზაციები წერილში აღნიშნავენ, რომ კონსტიტუციის პროექტით, გადაუნაწილებელი მანდატების პირველ ადგილზე გასულ პარტიას რჩება, 5-პროცენტიანი საარჩევნო ზღურბლი კი, ამომრჩეველთა არჩევანის გაუთვალისწინებლობას იწვევს. წერილშივე ვკითხულობთ საარჩევნო ბლოკების შექმნის აკრძალვის შესახებ, რომელზეც არასამთავრობო ორგანიზაციებს მიაჩნიათ, რომ გაზრდის გადაუნაწილებელი მანდატების რაოდენობას.

"ქვეყნის დემოკრატიული განვითარებისა და უკეთესი სამართლებრივი სისტემის შექმნისთვის მნიშვნელოვანია დაბალანსებული საარჩევნო სისტემის ჩამოყალიბება, ამიტომაც თქვენი პოზიცია აღნიშნულ საკითხთან დაკავშირებით უაღრესად მნიშვნელოვანია," - ვკითხულობთ განცხადებაში.