ყველა დროის ერთ-ერთი ყველაზე პოპულარული სიტკომის, მეგობრების თანაშემქმნელმა მართა კაუფმანმა ცოტა ხნის წინ ჩენდლერ ბინგის ტრანსგენდერ მშობელზე ისაუბრა. მისი თქმით, ნანობს, რომ სერიალში მას კაცად და მამად მოიხსენიებდნენ და შესაბამის ნაცვალსახელებს არ იყენებდნენ.

"მას ჩენდლერის მამად მოვიხსენიებდით მიუხედავად იმისა, რომ ის ტრანსგენდერი იყო. მაშინ ნაცვალსახელების მნიშვნელობა არ გვესმოდა, ამიტომ მას ქალის ნაცვალსახელით არ მოვიხსენიებდით. ეს შეცდომა იყო", — განაცხადა მართამ BBC-ისთან საუბრისას.

ინგლისურ ენაში მესამე პირის ნაცვალსახელები სქესის ნიშნით განსხვავდება, ტრანსგენდერი ან არაბინარული იდენტობის მქონე ადამიანები კი მათი გენდერული გამოხატვის შესაბამის ნაცვალსახელებს იყენებენ და არა — ბიოლოგიური სქესით განსაზღვრულს.

სერიალში ჩენდლერის ტრანსგენდერი მშობლის როლს კეტლინ ტერნერი ასრულებდა. ის მეშვიდე სეზონის სამ ეპიზოდში გამოჩნდა, 2001 წელს. სერიალში მის იდენტობაზე სერიოზულად საუბარი არასდროს ყოფილა, სხვა პერსონაჟები კი მასზე და მის გარეგნობაზე ხშირად ხუმრობდნენ. სერიალში ის ჰომოსექსუალად მიიჩნეოდა და ჰელენა ჰენდბასკეტის სახელით იყო ცნობილი.

2018 წელს ერთ-ერთ ინტერვიუში ტერნერმა აღიარა, რომ დღეს ამანდას როლს არ დათანხმდებოდა, რადგან, მისი აზრით, ამანდა ტრანსგენდერმა ქალმა უნდა განასახიეროს.

მართა კაუფმანის თქმით, ისიც გვიან გააანალიზა, რომ სერიალის მნიშვნელოვან პერსონაჟებს შორის შავკანიანი ადამიანები არ იყვნენ, რასაც ახლა ნანობს. მართამ აღნიშნა, რომ ამ ყველაფრის მიხვედრის შემდეგ ცდილობს, სამუშაო გარემო უფრო ინკლუზიური და ტოლერანტული იყოს, რადგან მასთან თავი ყველამ კომფორტულად იგრძნოს.

"მაშინ რომ ის მცოდნოდა, რაც ახლა ვიცი, რაღაცებს შევცვლიდი. არ ვიცოდი, მაგრამ ახლა ვისწავლე", — განაცხადა მართამ.