ევროკავშირის თავშესაფრის სააგენტოს ინფორმაციით, 2021 წელს საქართველოდან ევროპის ქვეყნებში თავშესაფარს 14 970 ადამიანი ითხოვდა. როგორც ირკვევა, 2020 წელთან შედარებით ეს მონაცემი 6 065 ადამიანით არის გაზრდილი.

რატომ არის მნიშვნელოვანი: როგორც წესი, საქართველოს მოსახლეობის შემცირების უმთავრესი მიზეზი მიგრაციაა. ამასთან, განვითარებადი ქვეყნებიდან მიგრანტთა ზრდა ეკონომიკურ და პოლიტიკურ გარემოაზეა დამოკიდებული.

  • 2021 წელს საქართველოში ემიგრანტების რიცხვმა იმიგრანტების რაოდენობას 25 966-ით გადააჭარბა. ეს ერთ-ერთი ფაქტორი იყო, რის გამოც გასულ წელს ქვეყნის მოსახლეობა შემცირდა.

კონტექსტი: უნდა ითქვას, რომ 2020-2021 წლებში საქართველოდან ევროპაში თავშესაფრის მსურველთა რიცხვის ამგვარი (68%) ზრდა სხვა ფაქტორებთან ერთად პანდემიასაც უკავშირდება.

  • 2020 წელს მობილობის შემცირების გამო საქართველოდან ევროპაში თავშესაფრის მსურველთა რაოდენობა 13 860-ით, 8 905-მდე შემცირდა.

რიცხვებში: ბოლო წლების განმავლობაში საქართველოდან ევროპაში თავშესაფარს ამდენი ადამიანი ითხოვდა:

  • 2016 წელი — 8 775 ადამიანი;
  • 2017 წელი — 12 060 ადამიანი;
  • 2018 წელი — 20 950 ადამიანი;
  • 2019 წელი — 22 765 ადამიანი;
  • 2020 წელი — 8 905 ადამიანი;
  • 2021 წელი — 14 970 ადამიანი.

დეტალები: EUAA-ის ანგარიშის მიხედვით, საქართველოდან ყველაზე მეტი ადამიანი (37%) თავშესაფარს საფრანგეთში ითხოვდა.

  • 2021 წელს 10 590 საქართველოს მოქალაქეს თავშესაფრის მოთხოვნაზე უარი ეთქვა. ქვეყნებს შორის აქ 28%-ით გერმანია ლიდერობს.