რუსთაველის გამზირზე აქცია შინ ევროპისკენ გრძელდება. ამ ეტაპზე დემონსტრანტების ნაწილი მსვლელობით ქართული ოცნების ოფისთან მიდის.

რატომ არის მნიშვნელოვანი: 24 ივნისის აქციაზე სამოქალაქო საზოგადოებამ მოთხოვნები გააჟღერა, რომლის შესასრულებლად ხელისუფლებას დრო 3 ივლისამდე მისცა.

  • მოქალაქეებმა ირაკლი ღარიბაშვილის გადადგომა და ეროვნული თანხმობით მთავრობის შექმნა მოითხოვეს, რომელიც ევროკავშირის რეკომენდაციის თორმეტივე პუნქტს შეასრულებს.
  • შეუსრულებლობის შემთხვევაში მათ უწყვეტი პროტესტი დააანონსეს.

დეტალები: აქციაზე შოთა დიღმელაშვილმა განაცხადა, რომ 4 ივლისის დადგომამდე, მათი მოთხოვნების შესასრულებლად, ხელისუფლებას საათი და 15 წუთი დარჩა, მაგრამ ჩანს, იმის მიუხედავად, თუ რამდენი ადამიანი იკრიბება რუსთაველზე, მათთვის არაფერი იცვლება.

  • მისი თქმით, სწორედ ამიტომ, დილით არაძალადობრივი და მშვიდობიანი პროტესტით წავლენ მთავრობის ადმინისტრაციასთან და აუხსნიან იმას, რაც პარლამენტიდან "ვერ აუხსნეს".
  • "შემოვევლებით იმ ქაჯეთის ციხეს და მჯდომარე პროტესტით, მშვიდობიანად დავხვდებით მთავრობას, დავხვდებით ღარიბაშვილს და შევასმენთ ჩვენს ხმას, რახან აქედან არ ესმით".
  • მანვე განაცხადა, რომ გეგმის დანარჩენ ნაწილს შეკრებილებს ეტაპობრივად გააცნობენ.

შინ ევროპისკენ — ამ სახელით პირველი აქცია 20 ივნისს გაიმართა. მაშინ აქტივისტებმა მანიფესტი წაიკითხეს და პირობა დადეს, რომ ქვეყნის სუვერენიტეტისა და დასავლური კურსის დასაცავად იბროლებენ.

  • მეორე აქცია 24 ივნისს, მას შემდეგ გაიმართა, როცა კანდიდატის სტატუსზე საბოლოო გადაწყვეტილება გამოცხადდა — სწორედ მაშინ დაანონსდა მზადება 3 ივლისის აქციისთვის.
  • დღევანდელ აქციაზე მოქალაქეები სხვადასხვა რეგიონიდან ჩამოვიდნენ.
  • შეკრებილებს სიტყვით მიმართა 9 აპრილის სიმბოლომ, 1989 წლის აქციების მონაწილემ, მარი მახარაძემ — მისი ვიდეომიმართვის ნახვა შეგიძლიათ აქ.