ცოტა ხნის წინ მერილინ მონროს შესახებ გადაღებული ფილმის პირველი ტრეილერი გავრცელდა. Blonde მერილინ მონროს შესახებ მოგვითხრობს — იმაზე, თუ რას გრძნობდა და როგორ გადაიქცა ნორმა ჯინ მორტენსონი ჰოლივუდის ნამდვილ ლეგენდად.

ფილმში მთავარ როლს ანა დე არმასი ასრულებს. როგორც მსახიობი ამბობს, ძალიან დიდი დრო დაუთმო მერილინის ფოტოებისა და ვიდეოების ყურებას, ჩანაწერების მოსმენას. შედეგი კი სახეზეა — მსახიობი მერილინს გაჭრილი ვაშლივით ჰგავს.

ანა დე არმასი

ფოტო: Netflix

მერილინ მონრო

ფოტო: Getty Images

Blonde ჯოის კეროლ ოუტსის წიგნის მიხედვითაა გადაღებული. სექსუალური ხასიათის სცენების გამო ფილმმა NC-17 შეფასება დაიმსახურა — მისი ნახვა 17 წლამდე მაყურებლებისთვის მიზანშეწონილი არაა. ამის გამო საზოგადოების ნაწილმა რეჟისორი ენდრიუ დომინიკი გააკრიტიკა.

"თუ მაყურებელს არ მოსწონს, ეს მაყურებლის პრობლემაა", — ასე უპასუხა კრიტიკას რეჟისორმა.

ანა დე არმასი

ფოტო: Netflix

მერილინ მონრო

ფოტო: Getty Images

რეჟისორმა ასევე აღნიშნა, რომ ფილმი გულწრფელია და მისი მთავარი მიზანი პროვოკაციულობა კი არა, მაყურებლისთვის მერილინის შეყვარებაა.

"პირველი კითხვა ყოველთვის ეს იყო: 'რას გრძნობდა ნორმა ჯინი ამ მომენტში?' ჩვენ გვინდოდა, მისი ადამიანურ მხარეზე მოგვეყოლა. პოპულარულობამ მერილინ მონრო მსოფლიოში ყველაზე ხილვად ადამიანად აქცია, ნორმა კი — უხილავად", — აღნიშნა ანა დე არმასმა.

ფილმის პრემიერა ნეტფლიქსზე 23 სექტემბერსაა დაგეგმილი.