ჩინეთის სასამართლოს გადაწყვეტილებით, ერთ-ერთი წყვილის განქორწინებისას კაცს ყოფილი ცოლისთვის საშინაო შრომისა და ბავშვის მოვლის ანაზღაურება დაევალა. ისინი 7 წლის განმავლობაში იყვნენ დაქორწინებული და სასამართლომ კაცს ყოფილი ცოლისთვის 4 490 დოლარის გადახდა მიუსაჯა.

სასამართლოს თქმით, ქორწინების პერიოდში ცოლი სრულ განაკვეთზე მუშაობდა, რაშიც დიასახლისობა და ბავშვის მოვლა იგულისხმება. ამ დროს კი ქალის ქმარი სამსახურში იყო და ამ პროცესში არ ერთვებოდა.

"ქალი მარტო აკეთებდა ყველა საშინაო საქმეს, რაც საჭმლის კეთებას, სარეცხის რეცხვას, ბავშვის მოვლასა და საყიდლებზე სიარულს გულისხმობს, რის გამოც მან კომპენსაცია მოითხოვა. მისი ყოფილი ქმარი კი ამ ყველაფრის გამო პასუხისმგებლობას არ გრძნობდა, რადგან ოჯახს ფინანსურად ეხმარებოდა", — ნათქვამია სასამართლოს გადაწყვეტილებაში.

ეს სასამართლო პროცესი ადგილობრივ მედიაში განხილვის თემა გახდა. ჩინურ სოციალურ ქსელ Weibo-ს ერთ-ერთი მომხმარებელი თვლის, რომ $4,490 საერთოდ არ არის საკმარისი თანხა იმ შრომისთვის, რასაც ქალი 7 წლის განმავლობაში ოჯახისთვის აკეთებდა.

"ამ ამბავმა გვასწავლა, რომ ქალებმა საკუთარ თავზე აუცილებლად უნდა იზრუნონ. ნუ აკეთებთ საშინაო საქმეებს უფასოდ. აიძულეთ კაცები, რომ ზოგიერთი საქმე თავად გააკეთონ", — წერს ერთ-ერთი მომხმარებელი.

ეს პირველი შემთხვევა არ არის, როცა ჩინეთის სასამართლომ კაცს ყოფილი ცოლის მიერ შესრულებული საშინაო საქმეებისთვის კომპენსაციის გადახდა დაავალა. გასული წლის თებერვალში პეკინის სასამართლომ განქორწინებისას კაცს ყოფილი ცოლისთვის $7,479 გადახდა დააკისრა, რაც სასამართლოს თქმით, ქალის 5-წლიანი შრომის ანაზღაურებაა.