ინფორმაციული ტექნოლოგიების განვითარების ინსტიტუტი საქართველოს ინოვაციებისა და ტექნოლოგიების სააგენტოს მხარდაჭერით მართავს კონფერენციას სახელწოდებით "შეუზღუდავი შესაძლებლობები ონლაინსივრცეში". ღონისძიების თანაორგანიზატორია კალდარა. კონფერენცია 14 მაისს, 14:30-ზე, ინოვაციებისა და ტექნოლოგიების სააგენტოს შენობაში გაიმართება.

კონფერენციის მიზანია საზოგადოების ინფორმირება შემდეგ საკითხებზე:

  • როგორ იყენებენ უსინათლო ადამიანები კომპიუტერს, ინტერნეტს, ელექტრონულ ფოსტას, სოციალურ ქსელს;
  • რა ტექნოლოგიები და პრობლემები არსებობს საქართველოში ამ კუთხით;
  • რა მინიმალური რესურსით შეგვიძლია გავხადოთ ქართული ვებსივრცე ხელმისაწვდომი.

კონფერენციაზე ინკლუზიური განათლების სპეციალისტი, კახა ცხოვრებაშვილი ეკრანის წამკითხველებს და ოპტიმიზაციის პერსპექტივების შესახებ ისაუბრებს, მეტყველების სინთეზის შესახებ კი, მუნიციპალური სერვისების განვითარების სააგენტოს პროგრამისტი, ბექა ცხოვრებაშვილი. გარდა ამისა, კომპანია Circle-ის უფროსი დეველოპერი, ალექსანდრე ხუციშვილი ისაუბრებს ოპერაციული სისტემის ერთ-ერთ აუდიო ინტერფეისზე, ელენე ლაცოშვილი კი, ექსპერიმენტულ პროექტს – ბლოგების ადაპტირებულ სისტემას წარადგენს.

ღონისძიების კიდევ ერთი მომხსენებელი ინფორმაციული ტექნოლოგიების განვითარების ინსტიტუტის აღმასრულებელი დირექტორი გიორგი გვასალიაა. ის ისაუბრებს ინტერნეტის ხელმისაწვდომობის სტანდარტებზე.