გასულ ოთხშაბათს რუსეთის მთავარ რადიოსადგურზე კიბერშეტევა განხორციელდა, რის შედეგადაც პირდაპირ ეთერში უკრაინის ჰიმნი და ომის საწინააღმდეგო სიმღერები გაჟღერდა. ეს ინფორმაცია რუსული რადიოსადგურის, სახელად Kommersant FM-ის, მთავარმა რედაქტორმა უკვე დაადასტურა.

"ეს ნამდვილად კიბერშეტევა იყო, ტექნიკური სპეციალისტები ამ დრომდე მუშაობენ, რათა თავდამსხმელის ვინაობა გაარკვიონ", — აცხადებს რადიოსადგურის მთავარი რედაქტორი.

რადიოსადგური რუს ოლიგარქ ალიშერ უსმანოვს ეკუთვნის, რომელიც რუსეთის ყველაზე მდიდარ ადამიანებს შორის მე-5 ადგილს იკავებს. მას ევროკავშირმა "პუტინის ერთ-ერთი საყვარელი ოლიგარქი" უწოდა და აშშ-სთან ერთად უსმანოვს რუსეთის უკრაინაში შეჭრის შემდეგ სანქციებიც დაუწესა.

ეს პირველი შემთხვევა არ არის, როცა უკრაინის მხარდამჭერი გზავნილები რუსეთის მედიაში გაჟღერდა. მარტში რუსეთის პირველ არხზე, ერთ-ერთი გადაცემის დროს, პირდაპირ ეთერში შემდეგი წარწერები გამოჩნდა: "არ დაუჯერო პროპაგანდას" და "აქ ისინი გატყუებენ".

გასულ თვეში კი, როცა რუსეთი ეროვნულ სამხედრო ფესტივალს აღნიშნავდა, რამდენიმე სამაუწყებლო ტელევიზიის პირდაპირ ეთერში ასეთი წარწერა გამოჩნდა: "თქვენს ხელებზე ათასობით უკრაინელისა და მათი ასობით მოკლული ბავშვის სისხლია". კიბერშეტევა განხორციელდა მაისშიც და სანქტ-პეტერბურგის სამ რადიოსადგურში ორ საათზე მეტხანს ომის საწინააღმდეგო სიმღერები ისმოდა.