რუსთავი 2-ის გადაცემა არჩევანში სტუმრობისას ტელეკომპანია მაესტროს დღეს გათავისუფლებულმა წამყვანმა გიორგი ისაკაძემ შპს სტუდია მაესტროს მიმართა და განაცხადა, რომ თავისი გუნდის წევრების განცხადების მოსმენის შემდეგ, ის მზადაა 1 ლარად დარჩეს ტელეკომპანიაში:

"თუ თქვენ მართლა არ გამოძრავებთ სხვა მიზნები და მზად ხართ პირუთვნელად იყოს შენარჩუნებული ბიზნესგადაცემების ის ტრენდი, რასაც რეალურად აქამდე ვაკეთებდით, მე გთავაზობთ, კონტრაქტის ცალმხრივად გაწყვეტის შემდეგ 1 ლარად, მზად ვარ დავრჩე ამ გადაცემის ხელმძღვანელი, ოღონდ ამ პროექტებმა, რომლებიც პირადად ჩემი შექმნილია, მის გუნდთან ერთად უცვლელად გააგრძელონ მუშაობა".

ისაკაძემ აღნიშნული გადაწყვეტილება მას შემდეგ მიიღო, რაც ბიზნესკონტაქტის გუნდმა შპს სტუდია მაესტროს მიმართა, დაებრუნებინათ გიორგი ისაკაძე, წინააღმდეგ შემთხვევაში სტუდიას სამსახურიდან დათხოვის "უფლებას უტოვებდნენ".

ისაკაძე დღემდე მაესტროს გადაცემების - საქმიანი დილის, ბიზნესკონტაქტისა და ანალიტიკის პროექტების მენეჯერი და წამყვანი იყო. მისი გათავისუფლების გადაწყვეტილება ტელეკომპანიის დირექტორმა, ზურაბ ნაყეურმა მიიღო.