LG-მ საკუთარი პროდუქტით რუსეთის მომარაგება შეაჩერა
რუსეთის უკრაინისადმი აგრესიას კიდევ ერთი მსხვილი ტექნოლოგიური კომპანია პასუხობს.
სამხრეთკორეულმა კორპორაცია LG-მ ოფიციალურ ვებგვერდზე გაავრცელა განცხადება, რომელშიც იტყობინება, რომ საკუთარი პროდუქტით რუსეთის მომარაგებას დროებით წყვეტს.
ჯერჯერობით უცნობია, რამდენ ხანს იქნება შეჩერებული რუსეთში LG-ის მოწყობილობების გაგზავნის პროცესი, თუმცა კომპანიაში ამბობენ, რომ სიტუაციას თვალს მიადევნებენ და მომდევნო ნაბიჯებს ამის მიხედვით გადადგამენ.
"ადამიანთა ჯანმრთელობასა და უსაფრთხოებაზე ძალიან ვღელავთ. LG ჰუმანიტარული მიზნების მხარდაჭერას კვლავაც განაგრძობს", — ვკითხულობთ განცხადებაში.
გაურკვეველია, რამ გამოიწვია LG-ის ასეთი დაგვიანებული რეაქცია. შეგახსენებთ, რომ ისეთმა კომპანიებმა, როგორიცაა Apple, Microsoft და Samsung, მსგავსს სანქციებს ომის დაწყებიდან მალევე მიმართეს.
ასევე, იხილეთ: ტექნოლოგიური გიგანტების სანქციები რუსეთს — ყველა, ვინც პუტინის რეჟიმს განუდგა
მართალია, LG-მ მობილური ტელეფონების ინდუსტრია დატოვა, მაგრამ ის სხვადასხვა საყოფაცხოვრებო ელექტრონული მოწყობილობის (ტელევიზორები, მაცივრები, კონდიციონერები) ერთ-ერთი მთავარი მწარმოებელია. შესაბამისად, რუსეთის მოსახლეობა არჩევანის სიმცირეს ნამდვილად იგრძნობს.
კომენტარები