ადამიანის უფლებათა ცენტრის განცხადებით, 2018 წელს მოკლული ვიტალი საფაროვის ოჯახის წევრების მიმართ სოციალურ ქსელში მუქარისშემცველი ტექსტები ვრცელდება. ამასთან, შექმნეს ყალბი ჯგუფი, სადაც მასა და მის ოჯახის წევრს შემაძრწუნებელი სიტყვებით მოიხსენიებენ.

"ფეისბუქში სხვადასხვა ყალბი ან რეალური პროფილის მფლობელი პირები ინტენსიურად პოსტავენ ფაშისტური და ქსენოფობიური შინაარსის, სიძულვილის ენის, მუქარის შემცველ ტექსტებს, მათ შორის — ებრაელების მიმართ, მათი განადგურების მოწოდებებით, ჰიტლერის მოხსენიებით და ა.შ. გარდა ამისა, ფეისბუქში უკვე არაერთი ყალბი ჯგუფი შეიქმნა ვიტალი საფაროვის ფოტოებით და შემზარავი დასახელებებით, სადაც მოკლული უფლებადამცველის სახელსა და დედამისს შემაძრწუნებელი სიტყვებით შეურაცხყოფენ", — ნათქვამია განცხადებაში.

ორგანიზაციის ცნობით, საფაროვის დედამ აღნიშნულზე სამართალდამცავ ორგანოებს მიიმართა. თუმცა ინფორმაცია იმის შესახებ, დაიწყო თუ არა გამოძიება, მას ამ დრომდე არ მიუღია. HRC აღნიშნავს, რომ პოლიციის მიერ ასეთ ფაქტებსა და სიძულვილით მოტივირებულ დანაშაულზე რეაგირების არქონა შემაშფოთებელია. ორგანიზაციაში ამბობენ, რომ ასეთმა მიდგომამ ქსენოფობიური და ფაშისტური ჯგუფების გააქტიურებასა და სიძულვილის გაღვივებაში თავისი წვლილი შეიტანა.

"ამ ჯგუფების აგრესია და შეუწყნარებლობა, დიდწილად, მიმართულია კულტურულად არადომინანტი სხვადასხვა უმცირესობის ჯგუფებისა და ლიბერალური შეხედულებების მქონე ადამიანების მიმართ. სიძულვილით მოტივირებულ დანაშაულებზე არასათანადო რეაგირების პრაქტიკა საფრთხეს უქმნის საზოგადოებრივ წესრიგს, ახალისებს მსგავს ჯგუფებს და ხელს უწყობს საზოგადოების პოლარიზაციას, ასევე — ქსენოფობიური, რასობრივი, ჰომოფობიური და სხვა ნიშნით სიძულვილის დანერგვას", — ამბობენ ისინი.

ორგანიზაცია ვიტალი საფაროვის ინტერესების დაცვას თბილისის სააპელაციო სასამართლოში აგრძელებს და რასობრივი, რელიგიური ან ეთნიკური შეუწყნარებლობის ფაქტის დადგენას ითხოვს. HRC-ის ინფორმაციით 2019 წლის 10 ივნისს, საქალაქო სასამართლომ ბრალდებულები ჯგუფურად ჩადენილ მკვლელობაში დამნაშავედ ცნო, თუმცა ეთნიკური შეუწყნარებლობის ნიშანი არ დაადგინა.

"სასამართლოს გადაწყვეტილება ვერ პასუხობს საქართველოს სისხლის სამართლის კოდექსის 259–ე მუხლის I ნაწილით დადგენილ სტანდარტს. ამ და მსგავს საქმეებზე სწორი სასამართლო პრაქტიკის დადგენისათვის კრიტიკულად მნიშვნელოვანია, ზემდგომმა ინსტანციამ გამოასწოროს გადაწყვეტილებაში არსებული ხარვეზები. გადაწყვეტილების მიღებისას მოსამართლემ უგულებელყო დამნაშავეების ზოგადი შეხედულებები ებრაელი ხალხისადმი და ამ საქმეზე არ დაადგინა შეუწყნარებლობის მოტივი, მიუხედავად იმისა, რომ სასამართლოზე გამოკვლეული მტკიცებულებები და არაერთი მოწმის ჩვენება ცალსახად ადასტურებდა დამნაშავეთა კუთვნილებას ნეონაცისტური ჯგუფებისადმი, რაც ანტისემიტური იდეოლოგიის გაზიარებასაც გულისხმობს", — ნათქვამია განცხადებაში.

აქედან გამომდინარე, ორგანიზაცია აღნიშნავს, რომ საფაროვის ოჯახის წევრების მიმართ თავდასხმის ფაქტებზე სამართალდამცავი ორგანოების მიუკერძოებელი და დაუყოვნებლივი გამოძიება სასიცოცხლოდ მნიშვნელოვანია. მათივე თქმით, ეს სამომავლოდ მსგავსი შემთხვევების პრევენცია იქნება. ამასთან, ხაზს უსვამენ იმას, რომ ხელისუფლებამ მსგავს ძალადობრივ ქმედებებზე სისხლის სამართლის პოლიტიკა უნდა გაამკაცროს.

ადამიანის უფლებათა ცენტრი საგამოძიებო ორგანოებს მოუწოდებს:

• დროულად, ობიექტურად და მიუკერძოებლად განახორციელონ ყველა შესაბამისი საგამოძიებო მოქმედება, გამოავლინონ ამ დანაშაულების ჩამდენი პირები და უზრუნველყონ მათი პასუხისგებაში მიცემა;
• სწორად დააკვალიფიცირონ ასეთი ტიპის დანაშაულები და თვალსაჩინო მტკიცებულებების შესაბამისად, გამოკვეთონ შეუწყნარებლობის მოტივი.

ორგანიზაცია საერთო სასამართლოებს მოუწოდებს:

• რასობრივი, რელიგიური, ეროვნული ან ეთნიკური შეუწყნარებლობის მოტივით ჩადენილი დანაშაულების განხილვისას განსაკუთრებული ყურადღება მიაქციონ საქმისთვის რელევანტურ ფაქტებს - ბრალდებულთა რწმენა-წარმოდგენებსა და შეხედულებებს, რის გამოც პირი/პირთა წრე შემდგომში შეუწყნარებლობის გამო ჩადის დანაშაულს;
• ზემდგომი ინსტანციის სასამართლომ სიღრმისეულად შეისწავლოს ვიტალი საფაროვის საქმის ფაქტობრივი გარემოებები, გამოავლინოს პირველი ინსტანციის სასამართლოს მიერ დაშვებული უხეში შეცდომები, განსაკუთრებით — დანაშაულის კვალიფიკაციასთან დაკავშირებით და დაადგინოს ეთნიკური ნიშნით შეუწყნარებლობის მოტივი, რომლის არაერთი პირდაპირი მტკიცებულება არსებობს საქმეში.

25 წლის უფლებადამცველი ვიტალი საფაროვი 2018 წლის სექტემბერში მოკლეს. საფაროვის მკვლელობისთვის გიორგი სოხაძე და ავთანდილ კანდელაკიშვილი დააკავეს. მათ რასობრივი, რელიგიური, ეროვნული ან ეთნიკური შეუწყნარებლობის გამო განზრახ მკვლელობას ედავებოდნენ. თუმცა მოსამართლემ დადასტურებულად არ მიიჩნია, რომ საფაროვი ეროვნული შეუწყნარებლობის მოტივით მოკლეს. ბრალდებულებს 15-15 წლით თავისუფლების აღკვეთა მიუსაჯეს.