დიდი ბრიტანეთის კომპანიები Marks & Spencer და Asos უკრაინელ ლტოლვილებს სამუშაო ადგილებით დაეხმარებიან, როცა ისინი ქვეყანაში ჩასვლას შეძლებენ. დიდი ბრიტანეთის მთავრობა არაერთხელ გააკრიტიკეს ლტოლვილთა კრიზისის შესახებ უმოქმედობის გამო, ახლა კი, როგორც ჩანს, ადგილობრივი ბიზნესი უკრაინელების დახმარებას თავად ცდილობს.

დიდი ბრიტანეთის 45-ზე მეტი ბიზნესი მთავრობას მიმართავს და ითხოვს, რომ უკრაინელ ლტოლვილებს ქვეყანაში შემოსვლის პროცედურები გაუმარტივონ. ბრიტანეთში ჩამოსვლის შემდეგ ისეთი მსხვილი კომპანიები, როგორებიცაა Marks & Spencer, Asos, Lush და Robert Walters, უკრაინელებს დაასაქმებენ.

ამ კომპანიების მიერ შექმნილი უკრაინელთა დახმარების პროექტი ჯერ საწყის ეტაპზეა, თუმცა მისი მიზანია, რომ 10 ათასობით ლტოლვილს დაეხმაროს. გარდა უკრაინელი ლტოლვილების დასაქმებისა, პროექტი მათთვის საცხოვრებლის პოვნასა და ენის სწავლასაც ითვალისწინებს.

ფოტო: Getty Images

"ბიზნესებს ადამიანები გვჭირდება და ასევე გვინდა, რომ მათ დავეხმაროთ", — განაცხადა პროექტის ერთ-ერთმა ორგანიზატორმა და დასძინა, რომ ბრიტანეთის მთავრობას იმაზე "უკეთესად და სწრაფად" შეუძლია ლტოლვილების პრობლემის მოგვარება, ვიდრე ამას ახლა აკეთებს.

რუსეთის უკრაინაში შეჭრის გამო სამშობლოს დატოვება 2,5 მილიონ უკრაინელს მოუწია, რომლებიც ევროკავშირის ქვეყნებში ეძებენ თავშესაფარს. ახლა დიდ ბრიტანეთში იმ უკრაინელებს უშვებენ, რომლებსაც შეუძლიათ დაადასტურონ, რომ ბრიტანეთში ოჯახი უკვე ელოდებათ და დასარჩენი აქვთ. M&S, Asos და სხვა კომპანიები ამ სქემის გამარტივებას ითხოვენ, რათა ბრიტანეთის საზღვრის გადაკვეთა მეტმა უკრაინელმა შეძლოს.