პრემიერმინისტრმა ირაკლი ღარიბაშვილმა ბიზნესომბუდსმენად ოთარ დანელია დანიშნა. როგორც დანელია ამბობს, მნიშვნელოვანია საქართველოში კეთილსაიმედო და მიმზიდველი ბიზნესგარემოს შექმნა.

"ძალიან მნიშვნელოვანია საქართველოში კეთილსაიმედო და მიმზიდველი ბიზნესგარემოს შექმნა, არსებული პროცესების მაქსიმალური ოპტიმიზაცია, ბიუროკრატიის შემცირება და ახლა, პოსტკოვიდურ პერიოდში ძალიან მნიშვნელოვანია, უმაღლესი პრიორიტეტი მივანიჭოთ ქვეყანაში ინვესტიციების შემოდინებას და ადგილობრივი ბიზნესის განვითარებას", — თქვა დანელიამ.

მთავრობის ადმინისტრაციის ცნობით, პრემიერმინისტრმა ახალ ბიზნესომბუდსმენს კონკრეტული დავალებები მისცა და აღნიშნა, რომ მნიშვნელოვანია ბიზნესთან ღიად თანამშრომლობა, ნაკლები ბარიერები და რაც შეიძლება მინიმალური ბიუროკრატია.

დანელია დღემდე ეკონომიკისა და მდგრადი განვითარების მინისტრის პირველი მოადგილის თანამდებობას იკავებდა, 2014–2016 წლებში იყო სოფლის მეურნეობის მინისტრი, ხოლო 2016–2020 წლებში — საქართველოს მე-9 მოწვევის პარლამენტის წევრი და აგრარულ საკითხთა კომიტეტის თავმჯდომარე.