ახალგაზრდა ვარსკვლავებს შორის ტომ ჰოლანდსა და ზენდეიას ნამდვილად გამორჩეული ადგილი უჭირავთ, ამიტომ გასაკვირი სულაც არაა, რომ მათი დუეტი მაყურებლისთვის ერთიორად უფრო საყვარელია. გარდა იმისა, რომ ადამიანი ობობას ფილმებში შეყვარებულებს თამაშობენ, მსახიობები ერთმანეთს რეალურ ცხოვრებაშიც ხვდებიან და მათი ურთიერთობით ტკბობა არასდროს მოგბეზრდებათ.

ადამიანი ობობას ფილმის პრემიერამდე ცოტა ხნით ადრე ტომ ჰოლანდი და ზენდეია გრაჰამ ნორტონის გადაცემაში მიიწვიეს, სადაც მსახიობებმა ფილმის ერთ-ერთი სცენა განიხილეს და საკუთარ სიმაღლეებს შორის სხვაობაზეც იხუმრეს. ტომ ჰოლანდი დაახლოებით 173 სანტიმეტრია, ზენდეია კი — 178.

"ერთი კონკრეტული სცენაა, რომელშიც ხიდის თავზე დავფრინავთ, შემდეგ კი უნდა ჩამოვხტეთ. მან ემჯეი ფრთხილად უნდა დასვას ხიდზე და გზა გააგრძელოს. ჩვენს სიმაღლეებს შორის განსხვავების გამო ხიდზე ჯერ მე ვდგები, რადგან ჩემი ფეხები მიწას უფრო ადრე ეხება", — ამბობს ზენდეია.

საბოლოოდ, ისე ხდება, რომ ემჯეი ადამიან ობობას ხიდზე დახტომაში თავად ეხმარება, რისი დემონსტრაციაც მსახიობებმა გადაცემაშიც შემოგვთავაზეს. როგორც ჩანს, ტომს ძალიან მოსწონს, როცა ჰაერში იჭერენ და ფეხზე დადგომაში ეხმარებიან.

"ზენდეია მიწას ჩემზე ადრე ეხება, არადა მე სუპერგმირი ვარ — მაგარი ტიპი უნდა ვიყო!" — ამბობს ტომი.

"სინამდვილეში, ძალიან მადლიერი ხარ. სულ ამბობ: 'ღმერთო ჩემო, დიდი მადლობა", — ამბობს ზენდეია.

"ძალიან კარგი გრძნობაა, როცა ერთხელ სანაცვლოდ ჰაერში სხვა გიჭერს", — ხუმრობს ტომი.

ადამიანი ობობას ახალი ფილმის პრემიერა საქართველოში 15 დეკემბერსაა დაგეგმილი. აღსანიშნავია, რომ ცოტა ხნის წინ ტომ ჰოლანდის მონაწილეობით ადამიანი ობობას კიდევ 3 ფილმის გამოსვლა დაანონსდა.

ამავე თემაზე: