ჯორჯ კლუნი იმ ადამიანებს მიეკუთვნება, რომლებიც ფიქრობენ, რომ ყველაფერს ფულით ვერ იყიდი. Guardian-თან ინტერვიუში ოსკაროსანმა მსახიობმა და პროდიუსერმა განაცხადა, რომ მან უარი თქვა 35 მილიონ დოლარზე, რომელსაც ერთი დღის მუშაობის სანაცვლო უხდიდნენ.

"ავიაკომპანიის რეკლამაში მონაწილეობისთვის, რომელსაც მხოლოდ ერთი სამუშაო დღე სჭირდებოდა, 35 მილიონ დოლარს მთავაზობდნენ. ამის შესახებ ჩემს ცოლს (ცნობისთვის, კლუნის ცოლი ადვოკატია ადამიანის უფლებების მიმართულებით) ვესაუბრე და გადავწყვიტეთ, რომ შემოთავაზებაზე არ უნდა დავთანხმებულიყავი. ეს რეკლამა ისეთ ქვეყანას უკავშირდებოდა, რომელიც სხვებთან კი თანამშრომლობს, მაგრამ მაინც საეჭვო რეპუტაცია აქვს. ამიტომ გადავწყვიტე, რომ თუ მონაწილეობა ერთი წუთით მაინც არ მომცემდა მშვიდი ძილის საშუალებას, მაშინ არ ღირდა", — ამბობს კლუნი.

ფოტო: Nespresso

უნდა აღინიშნოს, რომ სამსახიობო კარიერის გარეთ ჯორჯ კლუნის მუშაობა მისთვის მნიშვნელოვან ფინანსურ წყაროს წარმოადგენს. Nespresso-ს რეკლამაში მონაწილეობამ მსახიობს 40 მლდ დოლარი მოუტანა, ხოლო საკუთარი ტეკილას მწარმოებელი კომპანიის, Casamigos-ის, გაყიდვით კლუნმა მილიარდი დოლარი მიიღო.

კლუნს იმის შესახებაც დაუსვეს შეკითხვა, თუ რატომ შეანელა სამსახიობო კარიერა დაქორწინების შემდეგ. " ზოგადად, ისეთი კარგი როლები არც ისე დიდი რაოდენობით შემორჩა, რომელშიც მონაწილეობის მიღებას ვისურვებდი. გასულ ზაფხულს, როცა 60 წლის გავხდი, ცოლთან ამ თემაზე ვისაუბრე. ორივეს გვიყვარს საკუთარი საქმე და მე, რა თქმა უნდა, ისევ შემიძლია, ფილმებშიც მივიღო მონაწილეობა, მაგრამ არ გვინდა, ისეთ შემოთავაზებებს დავთანხმდეთ, რომელთა გამოც სულელურ პოზიციაში აღმოვჩნდებით. ასე რომ, მე და ჩემს ცოლს გვსურს, დარწმუნებულები ვიყოთ, რომ ჩვენი ცხოვრებით ვცხოვრობთ", — უპასუხა მსახიობმა.

ფოტო: Casamigos

მსახიობმა აღნიშნა, რომ ის მალე ავსტრალიაში წასვლას აპირებს, სადაც ჯულია რობერტსთან და კეიტლინ დევერთან ერთად ახალი ფილმში, სახელად Ticket To Paradise, მიიღებს მონაწილეობას. მსახიობმა ასევე გაამხილა, რომ მომავალ ზაფხულს ბრეტ პიტთან ერთად კიდევ ერთ ფილმში ითამაშებს, თუმცა ინტერვიუში არ აღნიშნა, თუ რომელ ფილმზეა საუბარი.