მევიოლინე ლიზა ბათიაშვილი ექსპრეზიდენტ მიხეილ სააკაშვილის საკითხზე მოქმედ პრეზიდენტს, სალომე ზურაბიშვილს ღია წერილით მიმართავს. ბათიაშვილი აცხადებს, რომ ზურაბიშვილს შეუძლია, განმუხტოს ვითარება, წერტილი დაუსვას არაადამიანურ ქმედებებს და ამით დაეხმაროს არამხოლოდ სააკაშვილს, არამედ საქართველოს ასიათასობით მოქალაქეს.

ის მოუწოდებს პრეზიდენტს, არ დაუშვას სააკაშვილის გარდაცვალება, გადაიყვანონ ის კლინიკაში და აღნიშნავს, რომ წინააღმდეგ შემთხვევაში მისთვის წარმოუდგენელი იქნება, ქვეყანაში, "სადაც ხალხს აყურებინებენ გამოცხადებული სიკვდილის ქრონიკას", როგორ უნდა გამოვიდეს მუსიკოსი სცენაზე და როგორ უნდა იპოვნოს საკუთარ თავში დაკვრის ძალა.

"მინდა მოგმართოთ, როგორც ევროპაში გაზრდილ ქართველს, ასევე ევროპაში გაზრდილმა ქართველმა, ვისი გულიც ფეთქავს საქართველოს სიყვარულით და გაუსაძლის ვითარებაში იმყოფება ჩვენს სამშობლოში განვითარებული მოვლენების გამო. ჩვენ შევხვედრილვართ არაერთ კულტურულ ღონისძიებაზე, მუსიკისა და ხელოვნების მთავარი ღირებულება კი ჰუმანიზმი გახლავთ. ამიტომ გადავწყვიტე თქვენთვის ღია წერილით მომემართა.

დაუჯერებელია ის, რაც ჩვენს ქვეყანაში ხდება, განა შეიძლება მიხეილ სააკაშვილს გამიზნულად არ ეძლეოდეს საკუთარ სასამართლო პროცესზე დასწრების უფლება? არ შეეძლოს ისარგებლოს ყველაზე ელემენტარული უფლებებით, თუნდაც როგორიც არის სატელეფონო კავშირი საკუთარ ოჯახთან, ეზღუდებოდეს შვილებისა და დედის ხმის გაგონება. და რაც მთავარია, განა შეიძლება მას წართმეული ჰქონდეს ჯანმრთელობისა და სიცოცხლის უფლება? იმყოფებოდეს, უკიდურესად შეურაცხმყოფელ გარემოში, ფსიქოლოგიური ძალადობის ქვეშ, სადაც მისი ნების საწინააღმდეგოდ, მოტყუებით იქნა გადაყვანილი", — წერს ის.

მევიოლინე ამბობს, რომ ემიჯნება ყოველგვარ პოლიტიკურ კუთვნილებას და უნდა მხოლოდ ის, წარმოადგენდეს ჰუმანურ, დემოკრატიულ ქვეყანას, სადაც არ იმეტებენ და არ კლავენ ხალხის არჩეულ პრეზიდენტებს.

"მინდა წარმოვადგენდე განსაკუთრებული ნიჭის მქონე ხალხის ქვეყანას, რომელიც თავისი ნებით კი არ ექცევა ოკუპანტის კლანჭებში, არამედ ამაყობს თავისი უნიკალურობითა და თავგანწირული ხალხის მიერ მოპოვებული დამოუკიდებლობით.

დამერწმუნეთ, ყველაზე მეტად შესაძლოა თქვენ გაგიჭირდეთ მშვიდი ძილი და განვითარებული დრამა გაგყვეთ მთელი ცხოვრება, რადგან თქვენ დღეს შეგიძლიათ ადამიანის სიცოცხლის გადარჩენა და ამ გაურკვეველი, მოჯადოებული წრის გარღვევა", — წერს ის.

უკვე არაერთმა ცნობილმა ადამიანმა, კულტურისა და სამედიცინო სფეროს მოღვაწემ გაავრცელა ღია წერილი და განცხადება ექსპრეზიდენტ მიხეილ სააკაშვილის სამოქალაქო კლინიკაში გადაყვანის მოთხოვნით.

ამავე თემაზე:

• მიხეილ სააკაშვილის წამებით გადაუარეთ ყველას და ყველაფერს! — ბესიკ ხარანაული
• "დუმილი ამ დროს შეუძლებელია" — სააკაშვილის სამოქალაქო კლინიკაში გადაყვანას ექიმი, გია გვარამიაც ითხოვს
• ნიკოლოზ რაჭველი ხელისუფლებას მიხეილ სააკაშვილის სამოქალაქო კლინიკაში გადაყვანისკენ მოუწოდებს