ნაციონალური მოძრაობის წევრისა და ოპოზიციის ქუთაისის მერობის კანდიდატის, ხატია დეკანოიძის განცხადებით, მას სურს, რომ მიხეილ სააკაშვილმა პროტესტის ფორმა შეამსუბუქოს, რადგან, მისი თქმით, ექსპრეზიდენტის ჯანმრთელობის მდგომარეობა ახლა ძალიან მნიშვნელოვანია.

"რაღაცნაირად, შინაგანად მინდა, რომ მან ჯანმრთელობა გადაირჩინოს. რა თქმა უნდა, პატივს ვცემ მის არჩევანს, პროტესტის ამ უკიდურეს ფორმის, მაგრამ, ყოველშემთხვევაში, მეჩვენება, რომ ადამიანურად აუცილებლად უნდა ვუთხრა მას, რომ ყველაფერი გააკეთოს მან და გავაკეთოთ ჩვენ, რომ მისი ჯანმრთელობა გადარჩეს და ეს გულისხმობს, ასევე, პროტესტის შემსუბუქებას. ჩვენი წარმოდგენა ესეთია და მე როგორც ადამიანი და მეგობარი, პირველ რიგში, ამას ვისურვებდი", — თქვა დეკანოიძემ მთავარ არხთან.

დეკანოიძე, ასევე, აღნიშნავს, რომ ერთ-ერთი მთავარი ამოცანა მიხეილ სააკაშვილის გათავისუფლება უნდა იყოს, თუმცა, რეალური ბძროლისთვის მისი ჯანმრთელობის შენარჩუნებაა მნიშვნელოვანი.

"მე პირადად ძალიან მაწუხებს მიხეილ სააკაშვილის ჯანმრთელობის მდგომარეობა და მიხეილ სააკაშვილის თავისუფლება, ეს უნდა იყოს ერთ-ერთი მთავარი ამოცანა. არავითარ შემთხვევაში კონსერვაციისკენ არ უნდა წავიდეს ეს ყველაფერი, თუნდაც, ადამიანების ცნობიერებაში, პირიქით, მისი თავისუფლება არის ერთ-ერთი მნიშვნელოვანი და მე, როგორც მის მეგობარს, როგორც მის თანამებრძოლეს, როგორც ადამიანს, რომელიც ძალიან დიდ პატივს სცემს მესამე პრეზიდენტს, ვისურვებდი, რომ მისი ჯანმრთელობა იყოს ისეთი, როგორც აუცილებელია და რეალურია მომავალი ბრძოლისთვის", — ამბობს ის.

საქართველოს ექსპრეზიდენტი, მიხეილ სააკაშვილი დაკავებიდან, 31-ე დღეა შიმშილობს. გუშინ სააკაშვილმა განაცხადა, რომ იგი უარს ამბობს შიმშილობის შემამსუბუქებელ მკურნალობაზე, რადგან მას არ სურს გლდანის ციხის საავადმყოფოში გადაყვანა. თუმცა ამის მიუხედავად, ხელისუფლება არ აპირებს ის სამოქალაქო კლინიკაში მოათავსოს და აცხადებს, რომ დაწესებულებაში ყველა პირობაა შექმნილი, რათა პატიმრებს შესაბამისი სამედიცინო დამხარება გაუწიონ. გარდა ამისა იუსტიციის მინისტრი, რატი ბრეგაძე ამტკიცებს, რომ სააკაშვილს მკურნალობაზე უარი არ უთქვამს იღებს ყველა იმ სითხეს, პრეპარატსა და აბს, რასაც იღებდა წინა დღეების განმავლობაში.