იუსტიციის სამინისტროს განცხადებით, 25 ოქტომბერს, ექსპრეზიდენტ მიხეილ სააკაშვილის ადვოკატს, ნიკა გვარამიას უწყების გენერალური ინსპექციის გამომძიებელი შეხვდება. სამინისტროს ცნობით, შეხვედრის მიზანია გვარამიასგან დამატებითი ინფორმაციის მიღება მის მიერ გავრცელებული განცხადების შესახებ.

შეგახსენებთ, რომ მიხეილ სააკაშვილის ადვოკატებმა დღეს სპეციალური ბრიფინგი გამართეს და განაცხადეს, რომ მნიშვნელოვანია დაუყოვნებლივ გადაწყდეს სააკაშვილის ჰოსპიტალიზაციის საკითხი და გამოირიცხოს ციხის საავადმყოფო. ერთ-ერთი მიზეზი, რის გამოც სააკაშვილის ადვოკატებს არ სურთ მისი გადაყვანა გლდანის მე-18 დაწესებულებაში ექსპრეზიდენტის უსაფრთხოებაა. გვარამიას განცხადებით, ციხის საავადმყოფოში ხელისუფლება გეგმავს იმიტირებულ ბუნტს, რომელიც დასრულდება სააკაშვილის ლიკვიდაციით. მისივე თქმით, აქვთ ინფორმაცია, რომ ციხის საავადმყოფოში უკვე შეყვანილია რამდენიმე სპეცდანიშნულების პატიმარი, რომელიც "ამაზე იზრუნებს".