შფოთვის "მექანიზმი" იმისთვის შეიქმნა, რომ საფრთხეებისგან დაგვიცვას და რესურსების მობილიზებაში დაგვეხმაროს. როცა ანტილოპა ხარ და მტაცებელს გაურბიხარ, კარგია, თუ გული გიჩქარდება, ფოკუსი გივიწროვდება და სუნთქვა გიხშირდება. თუმცა რა უნდა ვქნათ, როცა იგივე მექანიზმი იპოთეკურ სესხზე ან მოახლოებულ შეხვედრაზე ფიქრისას გვიაქტიურდება?

პირველი დღე სკოლაში, გასაუბრება საოცნებო სამსახურში, სიტყვით გამოსვლის შიში — როგორც წესი, შფოთვა ორგანიზმის ბუნებრივი პასუხია სტრესზე. ჩვეულებრივ, სტრესის გამომწვევი მოვლენის ჩავლის შემდეგ შფოთვაც ქრება. თუ შფოთვა არ ქრება, მუდმივად თან გდევს და ყოველდღიურ ცხოვრებაშიც ხელს გიშლის, შესაძლოა საქმე შფოთვით აშლილობასთან ან მენტალურ ჯანმრთელობასთან დაკავშირებულ სხვა პრობლემასთან გვქონდეს.

სიმშვიდის ლაბორატორიის მეორე ეპიზოდში წამყვანები, ანინა ტეფნაძე და ნინიკო ლეკიშვილი ფსიქოლოგ ანა ღვინიანიძესთან ერთად საუბრობენ შფოთვით აშლილობაზე და პასუხობენ მსმენელების კითხვებს.

სიმშვიდის ლაბორატორია ყოველკვირეული პოდკასტია მენტალური ჯანმრთელობის შესახებ. პროექტის პარტნიორია Responsible.ge

თუ მენტალურ ჯანმრთელობასთან დაკავშირებული საკითხები გაინტერესებთ ან უბრალოდ — გჭირდებათ მხარდაჭერა, შემოგვიერთდით ჯგუფში მენტალური ჯანმრთელობის ფორუმი.