მარველისა და WandaVision-ის გულშემატკივრებისთვის მშვენიერი სიახლე გვაქვს: Disney Plus ახალ სპინოფ სერიალზე მუშაობს, რომლის ერთ-ერთი მთავარი გმირიც კეტრინ ჰანის აგათა ჰარკნესი იქნება.

ჯერჯერობით სერიალის შესახებ დეტალები ცნობილი არაა, თუმცა გავრცელებული ინფორმაციით, ძლევამოსილი ჯადოქარი ჩვენი გულების დაყრობას შავი იუმორით შეეცდება. აღსანიშნავია ისიც, რომ ახალ სერიალზე WandaVision-ის შემქმნელები იმუშავებენ.

კეტრინ ჰანი WandaVision-ში ვანდას ცნობისმოყვარე მეზობლის როლს ასრულებს, რომელიც მოგვიანებით ჯადოქარი აგათა ჰარკნესი აღმოჩნდება. აღანიშნავია, რომ ამ შესანიშნავმა შესრულებამ მსახიობს ემის ნომინაციაც მოუპოვა.

WandaVision მულტიჟანრობრივი სერიალია, რომელიც Disney+-სთვის ჟაკ შეფერმა შექმნა. მასში მოქმედება Avengers: Endgame-ში განვითარებული მოვლენებიდან რამდენიმე კვირის შემდეგ ხდება. ისტორია სუპერძალის მქონე ორ პერსონაჟს — ვანდასა (ელიზაბეთ ოლსენი) და ვიჟენის (პოლ ბეტანის) — გარშემო ვითარდება. ისინი ნიუ-ჯერსის პატარა ქალაქის გარეუბანში იდილიურად ცხოვრობენ, თუმცა, მალევე აღმოაჩენენ, რომ აქ ყველაფერი ისე არ არის, როგორც ერთი შეხედვით ჩანს.

2021 წლის იანვარში გამოსულმა სერიებმა, რომლებიც რომანტიკის, სიტკომის, დრამის, კომიქსისა და დეტექტივის ნაზავია, მაყურებლებისა და კრიტიკოსებისგან დადებითი შეფასება დაიმსახურა. სერიალი ემის 23 ნომინაციაში იყო წარდგენილი და მარველს პირველი ჯილდოც მოუპოვა.

ამავე თემაზე: