ქვეყანას, რომელსაც კორეის სახალხო დემოკრატიული რესპუბლიკა უწოდეს, დემოკრატიული ღირებულებები ნაკლებად აქვს. ამის მაგალითია, თუნდაც, კორეიდან გაქცეული გოგონას გამოსვლა, რომელშიც ის ქვეყანაში არსებულ მძიმე მდგომარეობაზე საუბრობს და ამბობს, რომ მისი მეგობრის დედა მხოლოდ იმიტომ დასაჯეს, რომ ჰოლივუდურ ფილმს უყურა.

გარდა ამისა, ჩრდილოეთ კორეა არის ქვეყანა, სადაც პორნოგრაფიის ყურება და ბიბლიის კითხვა ერთნაირად მძიმე დანაშაულია, სადაც კიმ ჩენ ინმა სარკაზმი აკრძალა და ცოტა ხნის წინ ბრძანება გასცა, რომლის მიხედვითაც შობის ნაცვლად ქვეყანაში ბებიამისის, ჩენ სუკის დაბადების დღე აღინიშნება.

ჩრდილოეთ კორეის მდგომარეობის შესახებ საინტერესო ფოტომასალა გამოაქვეყნა ფოტოგრაფმა მაიკლ ჰუნიევიჩმაც. რომელიც ყვება, რომ მისი ჯგუფის წევრები ვალდებულნი იყვნენ, ქალაქში მხოლოდ გიდის თანხლებით გადაადგილებულიყვნენ. ავტობუსის მძღოლი, რომელიც ტურისტებს ქალაქს აჩვენებდა, სვლას ანელებდა, როცა ლამაზ უბანში ხვდებოდნენ. ამის საპირისპიროდ, მოძრაობა ჩქარდებოდა, როცა ღარიბი კვარტლები უნდა გაევლოთ. დაუშვებელი იყო, ტურისტებს ქალაქის ცუდი მხარე ენახათ ან გადაეღოთ. ქუჩებში კი ყველგან ჯარისკაცები დგანან და მათი მთავარი ფუნქცია ყველა ადამიანის კონტროლია.

გარდა ამისა, როგორც აღმოჩნდა, თუ ჩრდილოეთ კორეაში დაიბადეთ და თქვენმა წინაპარმა დანაშაული ჩაიდინა, თქვენი საქმე სახარბიელოდ ნამდვილად არ ყოფილა, რადგან ამ დანაშაულისთვის პასუხს თქვენც აგებთ. მათი კანონების მიხედვით სასჯელი სამ თაობაზე გადადის და თუ ოჯახის ერთი წევრი დამნაშავეა, ეს ავტომატურად ნიშნავს იმასაც, რომ პასუხისმგებლობა მთელ ოჯახს ეკისრება.