ყოფილ დეპუტატსა და ოლიმპიურ ჩემპიონს, ზურაბ ზვიადაურს აღკვეთის ღონისძიების სახით პატიმრობა შეეფარდა. პირველი არხის ინფორმაციით, აღკვეთის ღონისძიების მოთხოვნა ბრალდების მხარემ დააყენა და არგუმენტად მიმალვა, მოწმეზე ზემოქმედება და ახალი დანაშაულის ჩადენის შესაძლებლობა დაასახელა. დაცვის მხარე ზვიადაურისთვის 50 000-ლარიან გირაოს ითხოვდა.

პატიმრობა შეეფარდა მასთან ერთად დაკავებულია კიდევ ერთი პირს, რომელსაც შსს ცეცხლსასროლი იარაღის დაუდევრად შენახვას ედავება. დაცვის მხარე მისთვის 5 000-ლარიან გირაოს ითხოვდა.

ზვიადაურს თავდებში უდგებოდნენ ოლიმპიური ჩემპიონები, ლაშა ტალახაძე, ლაშა ბექაური და ყოფილი დეპუტატი ზაქარია ქუცნაშვილი.

პოლიციამ ზვიადაური მკვლელობის ბრალდებით დააკავა. შინაგან საქმეთა სამინისტრის ინფორმაციით, მან სასიკვდილოდ დაჭრა პირი, რომელმაც მისი ძმა, ზვიად ზვიადაური მოკლა. ის თავს დამნაშავედ არ ცნობს.

შსს-ს ინფორმაციით, 16 აგვისტოს, წინანდლის მიმდებარე ტერიტორიაზე რამდენიმე პირს შორის ყოფით ნიადაგზე შელაპარაკება მოხდა, რომელიც ფიზიკურ დაპირისპირებაში გადაიზარდა. უწყება ამბობს, რომ დაპირისპირებისას 1971 წელს დაბადებულმა ვ.ც.-მ ცეცხლი გახსნა იარაღიდან, რომელიც დაკავებულ ჯ.ჯ.-ს სახელზეა რეგისტრირებული. შსს-ს ინფორმაციით, ამას 1994 წელს დაბადებული ნ.კ.-ს მხრიდან საპასუხო სროლა მოჰყვა, რის შედეგადაც 4 ადამიანი დაიჭრა, მათ შორის 2 კი შემთხვევის ადგილზე გარდაიცვალა. სწორედ ამ ორ გარდაცვლილს შორისაა ზურაბ ზვიადაურის ძმა, ზვიად ზვიადაური. შსს-ს ცნობით, მომხდარი დაპირისპირებისას ცეცხლსასროლი იარაღიდან ისროლა ოლიმპიურმა ჩემპიონმა ზურაბ ზვიადაურმაც, რა დროსაც სასიკვდილოდ დაიჭრა პირი, რომლის გასროლის შედეგადაც გარდაიცვალა ზვიადაურის ძმა.

ამავე თემაზე: