აჭარის საზოგადოებრივი ჯანდაცვის ცენტრის ხელმძღვანელის მოადგილე, ნონა ეფაძე აცხადებს, რომ ბათუმის სამედიცინო კლინიკებში პაციენტები დერეფნებში, შესაძლოა, დროებით იყვნენ, სანამ ახალი საწოლი გათავისუფლდებოდა.

"დღის განმავლობაში არ გვაქვს აქტიურად სოციალურ ქსელებში ინფორმაციის მიდევნების საშუალება, მაგრამ როგორც გადმომცეს, ამის შესაბამისად, შესაძლოა, ეს იყო პაციენტის დროებითი დაყოვნება შემდეგი საწოლების გათავისუფლებამდე კონკრეტულ კლინიკაში", — ამბობს ის.

ჟურნალისტის კითხვაზე — ეს ინფორმაცია, რომ საწოლები აღარ არის თავისუფალი და ადამიანები კორიდორებში წვანან, ეს სიტუაცია არ გვაქვს კლინიკებში? ეფაძე ამას უარყოფს. მისი თქმით, ამ დროის მდგომარეობით, 60-მდე საწოლია თავისუფალი.

"თუმცა, მე ვამბობ, რომ საწოლების ფონდი არის, რა თქმა უნდა, თავისუფალი მინიმუმამდე მაგრამ მიმდინარეობს დამატება საწოლების, ანუ მობილიზება სხვა კლინიკებში, სხვა განყოფილებების", — განაცხადა მან.

დღეს სოციალურ ქსელში გავრცელდა ფოტო, სადაც ჩანს, რომ ბათუმის სამედიცინო ცენტრი, სადაც კოვიდინფიცირებულებს მკურნალობენ პაციენტები დერეფნებში ჰყავთ. ფოტო 2 დღის წინ არის გადაღებული და ჟურნალისტ ირინე წუწუნავას კლინიკის პაციენტმა მიაწოდა. კლინიკაში On.ge-ს განუცხადეს, რომ ამ თემაზე კომენტარს არ აკეთებენ.

ჯანდაცვის სექტორის წამრომადგენლებს არაერთხელ უსაუბრიათ საწოლფონდის მობილიზებასა და რესურსის ამოწურვაზე. გუშინ, 9 აგვისტოს ეკატერინე ტიკარაძემ განაცხადა, რომ საწოლფონდის სერიოზული დეფიციტია. გარდა ამისა, ჯანდაცვის სამინისტროს ინფორმაციით, კოვიდპაციენტებისთვის მაქსიმუმ 8 000 საწოლის გამოყენება შეუძლიათ. მინისტრის მოადგილის, თამარ გაბუნიას თქმით, 4 აგვისტოს მდგომარეობით, 7 000-მდე საწოლია მობილიზებული და დამატებითი კლინიკები და სასტუმროები ერთვებიან, თუმცა მას ზუსტი რაოდენობა არ დაუკონკრეტებია.