ჯანდაცვის მინისტრის მოადგილე ამბობს, რომ ახლა პიკის ფაზაში ვიმყოფებით და 10 აგვისტოდან შემთხვევების რაოდენობის დაკლებაა მოსალოდნელი. ამის შესახებ თამარ გაბუნიამ საკორდინაციო საბჭოს სხდომის შემდეგ განაცხადა.

"ჩვენი პროგნოზი ემყარება სხვადასხვა საერთაშორისო ინსტიტუციის მიერ ჩატარებულ შეფასებებს. ახლა ვიმყოფებით პიკის ფაზაში და პროგნოზულად, დაახლოებით, 10 აგვისტოდან მოსალოდნელია, რომ შემთხვევების რაოდენობამ დაიკლოს. სიკვდილიანობის მაჩვენებელს ვინარჩუნებთ 1.3-1.4%-ის ფარგლებში, ამდენად ეს არის ის მათემატიკა, რაც მე შემიძლია დღეს გაგიზიაროთ", — ამბობს ის.

ბოლო დღეების განმავლობაში დაავადებათა კონტროლის ცენტრის ხელმძღვანელმა და ჯანდაცვის მინისტრის მოადგილემ რამდენჯერმე განაცხადეს, რომ ახლა პიკის ფაზაში ვართ და ვითარების დასტაბილურებას აგვისტოს შუა რიცხვებისთვის აანონსებენ. ეს შეფასებები კოვიდინფიცირების მზარდი შემთხვევების გამო კეთდება. 3 აგვისტოს კორონავირუსის 4 827 ახალი შემთხვევა დაფიქსირდა, რაც დაავადებათა კონტორლის ცენტრის ხელმძღვანელის თქმით, წელს ანტირეკორდია და მიაუხლოვდა შარშანდელ ყველაზე მაღალ მაჩვენებელს, როდესაც 2020 წლის ნოემბრის ბოლოს ქვეყანაში, ეპიდსიტუაციის გამო, მკაცრი შეზღუდვები დაწესდა. 4 და 5 აგვისტოს ინფიცირების მაჩვენებელი, 3 აგვისტოსთან შედარებით, მცირედით ნაკლებია, მაგრამ ორივე დღეს გარდაცვალების 38 შემთხვევაა დაფიქსირებული.