კონკურს ლიტერაში მონაწილეობაზე უარი კიდევ ერთმა მწერალმა, ირაკლი კაკაბაძემ თქვა. 26 ივლისს ლიტერატურული პრემია ლიტერას გრძელი სია გამოქვეყნდა, სადაც წლის საუკეთესო პოეტური კრებულის კატეგორიაში მისი წიგნი, ამაღლების ქუჩა იყო შესული.

გადაწყვეტილების შესახებ მწერალმა ინფორმაცია ფეისბუქზე გაავრცელა და ხაზი გაუსვა, რომ მისი პროტესტი კულტურის მინისტრს, თეა წულუკიანს და მის შერჩეულ ჟიურის წევრს მიემართება, ხოლო მწერალთა სახლს სოლიდარობა გამოუცხადა და დასძინა, რომ წულუკიანის გადაწყვეტილება სწორედ ამ ორგანიზაციას აზიანებს.

კაკაბაძემ წულუკიანს "ძალადობის წამხალისებელი, ჰომოფობიის მხარდამჭერი, ზიზღისა და სიძულვილის დამმკვიდრებელი, ასევე კულტურის სამინისტროს მართვისთვის სრულიად არაკომპეტენტური პირი" უწოდა. მან დასძინა, რომ წულუკიანმა ჟიურის წევრად იოსებ ჭუმბურიძე "ბოლშევიკური წესით" მიავლინა და დანიშნა.

ირაკლი კაკაბაძე ამბობს, რომ თანამედროვე ლიტერატურა და ლიტერატურული პროცესი საქართველოს საზოგადოებრივი და პოლიტიკური ცხოვრების სარკეა და სხვა მწერლებსაც მოუწოდებს ხმის ამაღლებისკენ:

"დღეს მეც ვუერთდები ჩემს ძვირფას კოლეგებს, ვინც პროტესტის ნიშნად მოხსნა საკუთარი წიგნები პრემიიდან და მოვუწოდებ ყველა მწერალს, ვისთვისაც ძვირფასია ამ ქვეყნის მომავალი, ქართული კულტურა და მწერლობა, ვინც თვლის, რომ არასოდეს აღარ უნდა დავბრუნდეთ უკან საბჭოთა წარსულში, გამოხატეთ თქვენი პოზიცია და ხმა აღიმაღლეთ ამ უმსგავსობის წინააღმდეგ".

ლიტერას კონკურსის შედეგებს ჟიურის 5 წევრი შეაფასებს, რომელიც კულტურის სამინისტროსა და მწერალთა სახლის მიერაა შერჩეული. ჟიურის წევრებიდან 4 მწერალთა სახლმა, ხოლო ერთი — ირაკლი ჭუმბურიძე, კულტურის სამინისტრომ შეარჩია. მათ მუშაობა დღეიდან დაიწყეს.

• ბელა წიფურია - ლიტერატურათმცოდნე;
• რეზო თაბუკაშვილი - მწერალი;
• ლელა კოდალაშვილი - მწერალი, კრიტიკოსი;
• ოქტაი ქაზუმოვი - ლიტერატურათმცოდნე, მთარგმნელი;
• იოსებ ჭუმბურიძე - პუბლიცისტი.

ლიტერატურული პრემიის გამარჯვებულების ვინაობა ფარული კენჭისყრის შემდეგ გახდება ცნობილი. ლიტერატურული პრემიის საპრიზო ფონდი 30 000 ლარია, ხოლო 6 ნომინაციიდან თითოეულში გამარჯვებული ფულად პრემიას, 5 000 ლარს, მიიღებს.

წულუკიანის და კულტურის სამინისტროს მიზეზით ლიტერას კონკურსი დატოვეს მწერლებმა, ტორესა მოსიმ და მათე სარალიშვილმა და დიზაინერმა ნატალია ავალიანმა.

ტორესა მოსიმ კულტურის სამინისტროს ბოიკოტი ჯერ კიდევ 22 ივლისს გამოუცხადა, როდესაც თეა წულუკიანმა მთავარი არხის ჟურნალისტს ემა გოგოხიას მიკროფონი სენაკის თეატრში წაართვა და შეურაცხყოფა მიაყენა. უხეშად წართმევის შემდეგ, მინისტრმა მთავარი არხის მიკროფონით დაიწყო საუბარი და ბიძინა ივანიშვილს მადლობა გადაუხადა. წულუკიანი ჟურნალისტს უთხრა: "ემა, მოდი, აბა თქვი, ბიძინას გაუმარ...". მანვე Facebook-ზე გამოაქვეყნა ფოტო და დაწერა, რომ ამიერიდან გაკეთებული საქმეების შესახებ ამ მიკროფონით უნდა "გვაუწყოს". მინისტრის აზრით, ამ საქციელით ჟურნალისტი განაიარაღა.

პრემია ლიტერა განათლების, მეცნიერების, კულტურისა და სპორტის სამინისტრომ და მწერალთა სახლმა 2015 წელს დაარსეს და მას შემდეგ ყოველწლიურად გაიცემა 6 ნომინაციაში:

1. წლის საუკეთესო პროზაული კრებული;
2. წლის საუკეთესო რომანი;
3. წლის საუკეთესო პოეტური კრებული;
4. წლის საუკეთესო დოკუმენტური პროზა;
5. წლის საუკეთესო წიგნის დიზაინი;
6. წლის საუკეთესო დებიუტი.

კონკურსანტების მოკლე სიას ჟიური ნოემბრის დასაწყისში წარადგენს, გამარჯვებულების დაჯილდოების ცერემონია კი 2021 წლის დეკემბერში გაიმართება.