როგორც ჩანს, საქართველომ ჰოლივუდის კიდევ ერთი ვარსკვლავის ყურადღება მიიქცია.

ოქროს გლობუსის ნომინანტმა ჯოზეფ გორდონ-ლევიტმა ფეისბუქის პირად გვერდზე, რომელსაც თითქმის 6 მილიონამდე "მოწონება" აქვს, თბილისის ფოტო გამოაქვეყნა და ყველას თხოვა, საქართველოში გადაღებული სურათები გაეგზავნათ მისთვის.

ცხადია, ეს თხოვნა ბევრმა მაშინვე უანგაროდ შეასრულა და პოსტის კომენტარებიც სულ მცირე დროში აივსო საქართველოს ნაირ-ნაირი ფოტოსურათებით

საქმე იმაშია, რომ ეს 40 წლის მსახიობი თავისი ონლაინმედია პლატფორმა HitRecord-ზე აგროვებს მასალებს და ახალ პროექტზეც მუშაობს, რომლის დეტალები ბოლომდე ჯერ ცნობილი არ არის.

მართალია, ის ამ პროექტისთვის არა მარტო საქართველოდან, არამედ მსოფლიოს სხვა ქვეყნებიდანაც ეძებს ფოტოებს, მაგრამ სოციალურ ქსელებში ქართველების ტრადიციულად შესაშური აქტიურობით, დიდი ალბათობით, სწორედ ჩვენი ქვეყანა მიიქცევს განსაკუთრებულ ყურადღებას, თუნდაც ამას თავად მსახიობი საერთოდ არ ელოდეს.

და ვინ იცის, იქნებ მერე პირადადაც ეწვიოს საქართველოს.

ფოტო: Gifer

ჯოზეფ გორდონ-ლევიტს მრავალწლიანი კარიერის განმავლობაში შესრულებული აქვს როლები ისეთ ცნობილ ფილმებში, როგორებიცაა Inception (დასაწყისი), The Dark Knight Rises (ბნელი რაინდის აღზევება) და Lincoln (ლინკოლნი).