ქალთა დღეების აღსანიშნავად Cinédoc-Tbilisi-სა და გაეროს ქალთა ორგანიზაციის (UN Women) ერთობლივი ძალისხმევით 8-დან 10 მარტის ჩათვლით კინოთეატრ რუსთაველში დოკუმენტური ფილმების სეანსები გაიმართება. ფილმები განსხვავებული ასაკის, პროფესიისა და ინტერესების მქონე ქალებზე მოგვითხრობენ.

ეს ისტორიები კიდევ ერთი მკაფიო შეტყობინება იქნება საზოგადოებისთვის, რომ საჭიროა, მეტი ყურადღება დაუთმონ ქალების წინაშე აღმართულ ზღუდეებს, ბარიერებსა და სტიგმებს, რომლებიც 21-ე საუკუნეშიც კი მწვავედაა წარმოდგენილი.

კინოჩვენებების ციკლი ირანელი რეჟისორის, როხსარე გაემ მაგამის გამხაურებული ნამუშევრით, სონიტათი გაიხსნება, რომლის ჩვენებაც 8 მარტს საღამოს 8 საათზე გაიმართება. დასწრება მოსაწვევებით იქნება შესაძლებელი.

9 მარტიდან კინოჩვენებებზე დასწრება ყველას შეეძლება. გთავაზობთ იმ ფილმებს, რომლებიც პროექტის ფარგლებში შეგიძლიათ ნახოთ.

18:00 საათზე მაყურებელს საშუალება ექნება, ნახოს ფრანგი რეჟისორის, მარი ივ დე გრავის ფილმი - ღამის მშვენიერება.

ამავე დღეს, 20:00 სთ-ზე სალომე ჯაშის ფილმი დაისის მიზიდულობა შეგიძლიათ იხილოთ, რომელმაც თბილისის მე-17 საერთაშორისო კინოფესტივალზე დოკუმენტური ფილმების სექციაში განსაკუთრებული შთაბეჭდილება მოახდინა მაყურებლებზე.

10 მარტს, 18:00 საათზე სინედოკი წარმოგიდგენთ ჰელენა ტრეშტიკოვას ფილმს მალორი. ხოლო 20:00 სთ-ზე კინოჩვენებების ციკლი დასრულდება დანიელ აბმას ფილმით ტრანზიტ ჰავანა.

9 და 10 მარტს კინოჩვენებები რუსთაველის კინოთეატრის მესამე დარბაზში გაიმართება.