სანამ გამოყენებულ ელემენტს ნაგვის ურნაში ჩააგდებ, საკუთარ თავს ერთი მნიშვნელოვანი კითხვა უნდა დაუსვა: ამ ქმედებით გარემოს ზიანს ხომ არ ვაყენებ? აღნიშნულ კითხვაზე პასუხი დადებითია.

ელემენტი საკმაოდ სახიფათო ნარჩენია. ის შესაძლოა ისეთ საშიშ ქიმიკატებს შეიცავდეს, როგორებიცაა ტყვია, კადიუმი, ლითიუმი, თუთია და სხვ. თუ ჩვენი დაუდევრობით ელემენტი ნაგავსაყრელზე ან ბუნებაში აღმოჩნდება, აღნიშნული მავნე ნივთიერებები შესაძლოა, ნიადაგსა და მიწისქვეშა წყლებს შეერიოს, რის შემდეგაც ის საფრთხეს წარმოადგენს ცოცხალი არსებებისთვის, მათ შორის, ადამიანებისთვის.

სწორი გამოსავალი არც ელემენტის დაწვაა, რადგან მავნე ნივთიერებები ატმოსფეროში ხვდება. ასეთ დროს ელემენტი შეიძლება აფეთქდეს კიდეც, რაც საფრთხეს უქმნის ირგვლივმყოფ შენობა-ნაგებობებსა და ადამიანებს. ამასთან, 1 გამოყენებული ელემენტი დაახლოებით 20 მ2 ნიადაგსა და 400 ლიტრ წყალს აბინძურებს.

როგორ გადავამუშაოთ ელემენტები და დავიცვათ გარემო? — ამის შესახებ პატარა გზამკვლევს არაკომერციული ეკო-საგანმანათლებლო პროექტი Parki Ar Minda გვთავაზობს.

Parki Ar Minda 2019 წელს მარიამ ფესვიანიძემ და ტატიანა რემნევამ დააფუძნეს. პროექტი ნარჩენების გადამუშავების, გარემოს დაცვისა და ამ საკითხებზე საზოგადოების ცნობიერების ამაღლების მიმართულებით აქტიურად მუშაობს. მათ საინტერესო ფეისბუქ პოსტი ელემენტების გადამუშავებასაც მიუძღვნეს.

Parki Ar Minda-ს მიხედვით, გამოყენებული ელემენტები შეგიძლია შემდეგ ლოკაციებზე გაგზავნო:

  • სავაჭრო ცენტრ ისთ ფოინთში მდებარე შემგროვებელ პუნქტში;
  • კაფეებში — Mama Terra - Veggie corner (ინგოროყვას 20) და Shukura • შუქურა • Coffee • Humans (აბაშიძის 49). ორივე კაფე აგროვებს ელემენტებს, რომლებიც შემდეგ ეკო-ტაქსის მიაქვს;
  • Parki Ar Minda-ს ფარეხში, რომელიც ვაკეში მდებარეობს. ამისათვის მათ ფეისბუქ გვერდზე წინასწარ უნდა მიწერო;
  • ორთაჭალაში, სასტუმრო მერკურში;
  • ბათუმში კაფე Rhino Coffee Georgia-ში.

ამის გარდა, შეგიძლია, ეკო-ტაქსის მომსახურებით ისარგებლო და ელემენტები სხვა გადამუშავებად ნარჩენებთან ერთად ჩააბარო. ეკო-ტაქსი Parki Ar Minda-ს ერთ-ერთი ინიციატივაა, რომლის მიზანიც ადამიანებისთვის ნარჩენების შეგროვების პუნქტებში ჩაბარების გამარტივებაა.

ჩამოთვლილ ლოკაციებზე შეგიძლია A ტიპის ელემენტები, ნებისმიერი ზომის მრგვალი ელემენტები და ტელეფონებში გამოყენებული ლითიუმ-იონის ელემენტები ჩააბარო. შეგროვებული ელემენტები შემდგომი გადამუშავებისათვის არაბთა გაერთიანებულ საამიროებში კომპანია Madenat Caucasus-ის მიერ იგზავნება.

ელემენტების მოხმარების შესამცირებლად და გარემოს დასაცავად კარგი ალტერნატივა ისეთი ელემენტების გამოყენებაა, რომელთა ხელახლა დატენვაც შესაძლებელია. სხვა შემთხვევაში, გარემოსა და სხვათა სიცოცხლის დასაცავად ნარჩენების სწორად გადამუშავებაში საკუთარი წვლილის შეტანა აუცილებელია. ელემენტების გადამუშავება მნიშვნელოვანი კიდევ იმიტომაა, რომ მათი გამოყენება სხვა პროდუქტების, მათ შორის, ახალი ელემენტების წარმოებისთვისაა შესაძლებელი.

ამავე თემაზე: