ჭორიკანა ბრუნდება, ოღონდ სულ ახალი შემართებით და მანჰეტენის ახალგაზრდა ელიტური ჯგუფების ცხოვრებაზე საინტერესო დეტალების გამხელას აპირებს.

Gossip Girl (ჭორიკანა) პოპკულტურაში ერთ-ერთი ყველაზე საკულტო თინეიჯერული სერიალია, რომლის განახლებული ვერსიაც HBO Max-სთვის გადაიღეს. მართალია, ახალი შოუ იგივე სახელს ატარებს, თუმცა ის სულ სხვა პერსონაჟებზე მოგვითხრობს და სიუჟეტიც თანამედროვეობაში ვითარდება.

სულ ახლახან გამოსული ტრეილერი, რომელიც ფრენკ ოუშენის სიმღერითაა (Super Rich Kids) გაფორმებული, კვლავ დამაინტრიგებელ, საინტერესო და მრავალფეროვან სანახაობას გვპირდება:

სიუჟეტის ძირითადი ხაზი ნიუ-იორკის კერძო სკოლის ახალი თაობის მოსწავლეებზე იქნება ორიენტირებული, რომელთა ცხოვრებაზეც ამჯერად სოციალურ ქსელებს ექნება დიდი გავლენა: როგორც ტრეილერიდან გავიგეთ, ისტორიის მთავარი გმირი — ჭორიკანაც ინსტაგრამზე გამოაქვეყნებს ხოლმე ინფორმაციას.

ჯერ კიდევ გასულ წელს დადასტურდა, რომ ჭორიკანა ეკრანებზე ახალი სამსახიობო გუნდით ბრუნდებოდა: მთავარ როლებში ვიხილავთ ემილი ელინ ლინდის, უიტნი პიკს, ელი ბრაუნს, ჯონათან ფერნანდესსა და ჯეისონ გოტეის.

ჭორიკანას პირვანდელი სერიალი 2007 წელს გამოვიდა და 2012 წლამდე სულ ექვსი სეზონი გადაიღეს, რომლებშიც მთავარ როლებს ბლეიკ ლაივლი, ლეიტონ მისტერი, პენ ბეჯლი, ჩეის კროუფორდი, ტეილორ მომსენი, ედ ვესტვიკი, კელი რაზერფორდი და მეთიუ სეტლი ასრულებდნენ.

ბევრისთვის საყვარელი ამ შოუს განახლებული ისტორიის პრემიერა 8 ივლისს შედგება.