კინოგაქირავებაში A Quiet Place 2-ის (ჩუმი ადგილი 2) წარმატებული პირველი კვირის შემდეგ კინოსტუდია Paramount-მა ამ ფრენჩაიზის მესამე ფილმის გამოსვლის თარიღიც გაგვიმხილა.

ბოლო ათწლეულის ერთ-ერთი ყველაზე ცნობილი და აღიარებული საშინელებათა ჟანრის ფილმების სერია ახალი ნაწილით 2023 წელს დაბრუნდება, ოღონდ ერთი მნიშვნელოვანი ცვლილებით: მომავალ ფილმს ჯეფ ნიკოლსი გადაიღებს პირველი ორი ნაწილის რეჟისორის, ჯონ კრასინსკის ნაცვლად.

ჯონ კრასინსკიმ მანამდე განაცხადა, რომ მესამე ფილმი უფრო სპინოფი იქნება, ვიდრე პირდაპირი გაგრძელებაო, რაც იმას ნიშნავს, რომ დიდი ალბათობით, მესამე ფილმის სიუჟეტი სულ სხვა დროში განვითარდება და შესაძლოა, სულ სხვა პერსონაჟების ისტორიებიც ვიხილოთ.

ჩუმი ადგილი 2-ის პრემიერა 28 მაისს შედგა (საქართველოში 3 ივნისს) და პანდემიის მიუხედავად, კინოგაქირავებაში საოცრად წარმატებული აღმოჩნდა: უკვე მისმა შემოსავლებმა $58 მილიონს გადააჭარბა.

როგორც ზემოთ უკვე აღვნიშნეთ, მესამე ფილმში რეჟისორის ადგილს კონ კრასინსკისგან ჯეფ ნიკოლსი გადმოიბარებს. ამ უკანასკნელს აქამდე ისეთი ცნობილი ფილმები გადაუღია, როგორებიცაა Take Shelter, Midnight Special და Mud.

ისღა დაგვრჩენია, 2023 წელს დაველოდოთ და ვნახოთ, წარმატებული ორი ნაწილის შემდეგ როგორი იქნება ჩუმი ადგილის მესამე ფილმი.