ილია მეორეს დაცვის ყოფილი უფროსი სოსო ოხანაშვილი რუსთავი 2-თან ინტერვიუში არ უარყოფს, რომ პატრიარქს დეკანოზ გიორგი მამალაძის დაკავების შესახებ არქიმანდრიტმა დავით ჯინჭარაულმა ოპერაციის წინა დღეებში, მამალაძის დაკავების დღესვე, გაანდო.

ოხანაშვილის თქმით, პატრიარქს დაკავების და ბრალდების ყველა დეტალთან ერთად, ასევე უთხრეს, რომ მამალაძე მასთან ერთად მოქმედებდა პატრიარქის მოსაწამლად:

"არამარტო ის უთხრეს, რომ საწამლავით მასთან მიდიოდა, ასევე ის, რომ მე თბილისში გამომიძახეს დასაკითხად, ვითომ იმიტომ, რომ მე მამალაძესთან ერთად ვმოქმედებდი".

ოხანაშვილი მიიჩნევს, რომ ეს იყო "პირდაპირი დარტყმა პატრიარქის წინააღმდეგ", რადგან ორ დღეში მისთვის ოპერაცია უნდა გაეკეთებინათ და ამაზე მან ძალიან ინერვიულა.

ის ასევე იხსენებს, რომ ილია მეორეს ემოციური მდგომარეობა იმდენად დამძიმდა, რომ გერმანელმა ექიმებმა სასულიერო პირებს და მის გარშემომყოფებს სთხოვეს, მის ჯანმრთელობაზე ეზრუნათ, თორემ ოპერაციის გადადება გახდებოდა საჭირო.

"გერმანელმა პროფესორებმა თქვეს, რომ თავი შეეკავებინათ, თორემ ოპერაციას გადაწევდნენ. ეს აისახებოდა მის გულზე ნერვებზე, ის ძალიან ახლოს იყო დეკანოზ მამალაძესთან".

ოხანაშვილი საუბრობს შორენა თეთრუაშვილზეც და დასძენს, რომ მასთან კარგი ურთიერთობა არ ჰქონია.