ალბათ ისურვებდით, ქუჩაში პოლიციას არასდროს გაეჩერებინეთ, თუმცა, ეს მანამ, სანამ ტოპოტუნს გაიცნობთ — პატარა ბოცვერს, რომელიც ცოტა ხნის წინ უკრაინის შინაგან საქმეთა სამინისტროს დნეპრში მდებარე აკადემიის სტუდენტი გახდა.

ბევრ ქვეყანაში აღდგომის ერთ-ერთი სიმბოლო ბოცვერია. ფერად-ფერად კვერცხებთან ერთად ბავშვები ხშირად ცვლიან შოკოლადის ბაჭიებს, კურდღლის კოსტიუმში გამოწყობილები თამაშობენ "კვერცხებზე ნადირობას" და სხვა. უკრაინაში კი ერთ-ერთმა პოლიციის აკადემიამ გადაწყვიტა, აღდგომა სტუდენტი ბოცვერით ეზეიმა.

ტოპოტუნი სულ ცოტათი უფრო პატარა და ბეწვიანია სხვა სტუდენტებზე, სხვა მხრივ კი, თავადაც ასეთივე ნიჭიერი, მონდომებული და, რაც მთავარია, ფორმიანია.

ფოტო: Dnipropetrovsk State University of Internal Affairs / Facebook

ახალბედა პოლიციელი დაესწრო სწავლებებს, პრაქტიკულ მეცადინეობებს და სხვა საინტერესო აქტივობებშიც ამოყო თავი. აკადემიის ცნობით, ტოპოტუნმა ერთიორად აამაღლა სადღესასწაულო განწყობა, იპოზიორა თანაკურსელებთან ერთად და მათგან მოფერებაც დაიმსახურა.