ინტერნეტსივრცეში დიდი გამოხმაურება გამოიწვია იაპონიის ქალაქ ნოტოს ახალმა ქანდაკებამ. ამის მიზეზი კი ისაა, რომ უზარმაზარი კალმარის ასაგებად ქალაქმა პანდემიისთვის სახელმწიფოს მიერ გამოყოფილი თანხა დახარჯა.

პანდემიის ფონზე ეკონომიკის დასახმარებლად ცენტრალურმა ხელისუფლებამ ქალაქს დაახლოებით $7,3 მილიონი გამოუყო. აღსანიშნავია, რომ ეს თანხა კორონავირუსით ინფიცირებული პაციენტების მკურნალობისთვის არ იყო გამიზნული. ქალაქმა $274 000 კალმარის ქანდაკებისთვის დახარჯა, რომლის სიმაღლე 4 მეტრს, სიგრძე კი — 9 მეტრს აღწევს.

კალმარი ქალაქის დელიკატესად ითვლება და, ადგილობრივი მედიის მიხედვით, ქალაქის ოფიციალური პირები აღნიშნავენ, რომ ქანდაკება ტურიზმის განვითარების გეგმის შემადგენელი ნაწილია.

მიუხედავად იმისა, რომ სახელმწიფოს მიერ გამოყოფილი თანხა უშუალოდ კოვიდპაციენტების მკურნალობისთვის არ იყო გამიზნული, ქანდაკებამ ინტერნეტსივრცეში საზოგადოების ნაწილის უკმაყოფილება გამოიწვია. ისინი თვლიან, რომ თანხა ქალაქს სხვა, უფრო მნიშვნელოვანი მიზნისთვის უნდა გამოეყენებინა.