დაავადებათა კონტროლის ეროვნული ცენტრის დირექტორის, ამირან გამყრელიძის განცხადებით, 19 აპრილის შემდეგ ოკუპირებული ტერიტორიებიდან გადმოსული 587 ადამიანიდან 1-ს დაუფიქსირდა კორონავირუსი.

"19 აპრილიდან დაიწყო არაკონტროლირებადი ტერიტორიიდან გადმოსულ ადამიანთა ტესტირება ქვეყანაში ანტიგენი სწრაფი ტესტებით, დღეს დილისთვის იყო 587 ადამიანი, თითქმის ყველა გადმოსული გალის რაიონიდან. ორი გახლდათ მხოლოდ ცხინვალის რეგიონიდან ოძისის გადმოსასვლელით. გალში დგას დაავადებათა კონტროლის ცენტრის და საზოგადოებრივი ჯანდაცვის ბრიგადები, ყველა ეს ადამიანი იტესტება და ამ 587-დან ერთი გვქონდა მარტო დადებითი", — ამბობს გამყრელიძე.

უწყებათაშორისი საკოორდინაციო საბჭოს გადაწყვეტილებით, 19 აპრილიდან, ოკუპირებული ტერიტორიებიდან გადმომსვლელი მოქალაქეები, 5-დღიანი კარანტინის ნაცვლად, ანტიგენ-ტესტით ტესტირებას ექვემდებარებიან.