გუშინ ბერლინის საერთაშორისო კინოფესტივალზე რეზო გიგინეიშვილის ფილმის მძევლების პრემიერა გაიმართა.

ფილმი 1983 წელს ქართველი ახალგაზრდების მიერ თვითმფრინავის გატაცების მცდელობას ეხება. რეჟისორთან ერთად სცენარზე მწერალმა ლაშა ბუღაძემ იმუშავა. სიუჟეტი 80-იან წლებში მომხდარ მოვლენებს ზედმიწევნით არ მიჰყვება და გმირების საარსებო გარემოს სიღრმისეულად აღგვიწერს.

ლაშა ბუღაძის სცენარის მიხედვით, რეალურ ისტორიაზე გადაღებულ ფილმში პერსონაჟების სახელები და გვარები შეცვლილია. როგორც შევიტყვეთ, ერთ-ერთი ყველაზე ტრაგიკული პერსონაჟის, მღვდელი თეოდორე ჩიხლაძის როლს ქორეოგრაფი ილიკო სუხიშვილი ასრულებს.

ფოტო: Giorgi Rurua

მძევლები ქართულ-რუსულ-პოლონური მხარეების ერთობლივი პროდუქციაა. აღსანიშნავია ისიც, რომ მძევლების ერთ-ერთი პროდიუსერი ივა პუშინსკაა, რომელიც ოსკაროსან ფილმზე, იდაზე მუშაობდა.

ფილმში ასევე მონაწილეობენ: თინა დალაქიშვილი, ირაკლი კვირიკაძე, გიგა დათიაშვილი, გიორგი გრძელიძე, ბექა ლემონჯავა, გიორგი ტაბიძე, გიორგი ხურცილავა, ვახტანგ ჩაჩანიძე, ეკატერინე კალატოზიშვილი, დარეჯან ხარშილაძე, მერაბ ნინიძე, ავთანდილ მახარაძე და მიშა გომიაშვილი.