სასექსის ჰერცოგი, პრინცი ჰარი, კალიფორნიაში ჩავიდა და სილიკონ ველიზე მდებარე სტარტაპის, BetterUp-ის უფროსი აღმასრულებელი ოფიცერი გახდა. ჰარის ოფიციალურმა წარმომადგენელმა ბრიტანეთის სამეფო ოჯახის წევრის ახალი თანამდებობის შესახებ მედიაში გავრცელებული ინფორმაცია დაადასტურა.

სტარტაპი, რომლის ერთ-ერთი ხელმძღვანელიც ჰარი გახდა, მენტალურ ჯანმრთელობასა და პიროვნულ განვითარებასთან დაკავშირებულ სერვისებს, მათ შორის ინსტრუქტორის დახმარებას სთავაზობს მომხმარებელს. კომპანიის ვებგვერდზე ლიდერების ჩამონათვალში უკვე წერია ჰარის სახელი. იგი "ფილანთროპად, სამხედრო ვეტერანად, მენტალური კეთილდღეობის მხარდამჭერად და გარემოს დამცველადაა" მოხსენიებული.

ახალი სამსახური ჰარიმ მას შემდეგ დაიწყო, რაც რამდენიმე კვირის წინ, მასთან და მეგან მარკლთან ოპრა უინფრის ინტერვიუ გამოქვეყნდა. ინტერვიუში ჰარიმ და მეგანმა სამეფო ოჯახთან დაკავშირებულ არაერთ საკითხზე ისაუბრეს, მათ შორის იმ გავლენაზე, რომელიც სამეფო ოჯახში ცხოვრებამ იქონია წყვილის მენტალურ მდგომარეობაზე. მეგანმა ასევე აღნიშნა, რომ ჰარის სამეფო ოჯახმა ფინანსური უზრუნველყოფა შეუწყვიტა და მას დედის, პრინცესა დაიანას მიერ დატოვებული ქონება დაეხმარა.

ფოტო: Joe Pugliese / Associated Press

ახალდაკავებული თანამდებობის მნიშვნელობაზე თავად ჰარიმ ისაუბრა და სტარტაპთან თანამშრომლობის მიზეზები ახსნა.

"ყველაზე მეტად, რითაც BetterUp-მა ჩემი ყურადღება მიიქცია, არის ის, რომ მათი მისია — დაეხმარონ ადამიანებს საკუთარი პოტენციალის პოვნაში — მოითხოვს ინოვაციას, გავლენის მოხდენასა და გულწრფელობას. კომპანიის გუნდი კი წლებია, ამ საქმეს წარმატებით ართმევს თავს", — აღნიშნავს ჰარი.

აწ უკვე კომპანიის ერთ-ერთმა ლიდერმა აღნიშნა, რომ BetterUp-ის შეთავაზებული სერვისებით თავადაც უსარგებლია.

"BetterUp-ის ინსტრუქტორთან მუშაობა, მე პირადად, შეუფასებელ გამოცდილებად მიმაჩნია", — დასძენს ჰარი, — "შესანიშნავი ინსტრუქტორი შემხვდა, რომელმაც ჯანსაღი რჩევები და ნათელი ხედვა შემომთავაზა".

ეს უკვე მეორე ოფიციალური თანამდებობაა, რომელსაც პრინცი ჰარი გაერთიანებული სამეფოს დატოვების შემდეგ იკავებს. Archewell Audio-ს სახელით იგი ასევე თანამშრომლობს სტრიმინგ პლატფორმა Spotify-სთანაც, რომელზეც მისი და მეგან მარკლის მიერ შექმნილი პოდკასტებია განთავსებული.

ასევე იხილეთ: