დისნეის ჯადოსნური სამყარო საინტერესო და სახასიათო მთავარი გმირებით გამოირჩევა, რომელთაც მთელი ფილმის განმავლობაში ვგულშემატკივრობთ. თუმცა არც ის უნდა დაგვავიწყდეს, რომ დისნეი ბოროტმოქმედების შექმნასაც დიდი პასუხისმგებლობით ეკიდება და იმდენად საინტერესო ანტიგმირებს ქმნის, რომ მათ გასაცნობად დამოუკიდებელი ფილმებია საჭირო. ამ სტატიაში სწორედ ასეთ 8 ბოროტმოქმედს გაგაცნობთ.

1. იზმა — იმპერატორის ახალი თავგადასავალი

იზმა იმპერატორი კუსკოს მრჩეველია, რომელსაც იმპერატორის თავიდან მოშორება აქვს გადაწყვეტილი. იზმას სახასიათო გარეგნობასა და საუბრის მანერასთან ერთად, ტახტის ხელში ჩასაგდებად საჭირო უამრავი ხრიკი აქვს. როგორ გახდა იმპერატორის მრჩეველი? როგორ მოაწყო ასეთი საოცარი საიდუმლო ლაბორატორია? როგორ გაიცნო მისი თანაშემწე კრონკი? — ამ კითხვებზე პასუხის გასაცემად ნამდვილად ახალი ფილმია საჭირო.

2. ჰადესი — ჰერკულესი

უამრავ ადამიანს ჰადესი ჰერკულესზე მეტად უყვარს და ეს გასაკვირი სულაც არაა: რთულია ერთდროულად სასაცილო, საშიში და გონებამახვილი ჰადესითა და მისი დასამახსოვრებელი ფრაზებით არ მოიხიბლო. რას საქმიანობს მიწისქვეშეთში? როგორ გაჰყავს ერთფეროვანი ყოველდღიურობა? მეტი ინფორმაცია გვჭირდება!

3. ჯაფარი — ალადინი

სულთანის პირადი მრჩევლის, გაქნილი და ჭკვიანი ჯაფარის შესახებ კიდევ უფრო მეტს, ალბათ, ყველა დიდი სიამოვნებით გავიგებდით. განსაკუთრებით საინტერესო მისი ძალებია, რომელთა სიღრმისეულ გამოკვლევას ცალკე ფილმი აუცილებლად სჭირდება.

4. სინდრომი — სუპერ ოჯახი

სუპერგმირების გულშემატკივრობიდან ბოროტმოქმედობაბმდე — სინდრომი დისნეის ერთ-ერთი ყველაზე საინტერესო ბოროტმოქმედია. მას ზებუნებრივი ძალები არ აქვს, თუმცა გამომგონებელია. მან სუპერგმირების გასანადგურებლად და ჩასანაცვლებლად უამრავი იარაღი შექმნა, რათა ახალ სამყაროში ისინი გამორჩეულები ვეღარ ყოფილიყვნენ. სუპერ ოჯახი მისი განვლილი გზის საჩვენებლად საკმარისი ნამდვილად არაა.

5. ურსულა — პატარა ქალთევზა

ეს ექსცენტრიკული ბოროტმოქმედი ოდესღაც სასახლეში ცხოვრობდა, ახლა კი სხვებთან მაგიური კონტრაქტების გაფორმებითაა დაკავებული. რატომ გამოაგდეს სასახლიდან? იქნებ, თავიდან ქალთევზა იყო? მისი საინტერესო პიროვნების ირგვლივ დაგროვებულ კითხვებს პასუხი ფილმმა უნდა გასცეს.

6. კაპიტანი კაუჭა — პიტერ პენი

რატომ სძულს პიტერ პენი ასე ძალიან? როგორ აღმოჩნდა ნევერლენდში? ზუსტად როგორ დაკარგა ხელი? — ამ კითხვებზე პასუხი დისნეის ახალ ანიმაციას მოითხოვს, რომელიც უშუალოდ კაპიტან კაუჭაზე მოგვიყვება.

7. ფასილიერი — პრინცესა და ბაყაყი

ვუდუ, შავი მაგია, მომავლის წინასწარმეტყველება, ჯადოები და საშიში ჩრდილი — პრინცესა და ბაყაყის მთავარ ბოროტმოქმედს იმდენი საინტერესო უნარი აქვს, რომ მის გასაცნობად მხოლოდ ერთი ფილმი საკმარისი არაა. ეს ექსცენტრიკული, გაქნილი და ჭკვიანი პერსონაჟი საკუთარ ფილმს ნამდვილად იმსახურებს.

8. სკარი — მეფე ლომი

ამ სიის დასრულება სკარის გარეშე შეუძლებელია. საინტერესოა, როგორი იყო სკარისა და მუფასას ბავშვობა და რატომაა სკარი ძმისგან რადიკალურად განსხვავებული?