ქართული ოცნების ერთ-ერთი ლიდერი, მამუკა მდინარაძე აცხადებს, რომ ოპოზიციის მიერ პლებისციტის შეთავაზება "ვერ გაიყიდება და ვერ შეფასდება", როგორც კომპრომისი, რადგან ეს არის "წარმოუდგენელი წინადადება".

"პლებისციტი არის საკითხი, რომელიც მათი მხრიდან მცდელობად არის წარმოდგენილი, როგორც ქართული, ასევე საერთაშორისო საზოგადოების წინაშე, რომ თითქოს, ეს არის რაღაც ნაბიჯი. ერთადერთი თემა, ერთადერთი საკითხი, რომელიც მათ დააყენეს და ცდილობენ დღესაც, რომ კომპრომისულ ნაბიჯად გაყიდონ, ეს არის პლებისციტი. ეს ვერ გაიყიდება და ვერ შეფასდება კომპრომისად, ვერც გადმომდგმულ ნაბიჯად, იქედან გამომდინარე, რომ პლებისციტი არის წარმოუდგენელი წინადადება", — თქვა მან.

მდინარაძის განმარტებთ, ქართული ოცნების ყველა მომხრემ პლებისციტზე რომც თქვას, რომ ხელახალ არჩევნებს არ ემხრობა, მაინც მოუწევთ არჩევნების ჩატარება.

"ქართული ოცნების ყველა მომხრემ რომ დაუჭიროს მხარი, რომ არ გვინდა ხელახალი არჩევნები, მაინც იძულებული იქნები, რომ ჩაატარო ხელახალი არჩენები, მიუხედავად იგივე ლეგიტიმაციისა. როდესაც მთავრობის დაკომპლექტებას არ სჭირდება ლეგიტიმაცია 50% +1 ხმა, ამ დროს ჩვენ ხელახალ არჩევნებზე საფუძვლის და მათ შორის, სამართლებრივი საფუძვლის გარეშე ვიმსჯელოთ, რომ პლებისციტმა ასე გადაწყვიტოს, ასეთი წინადადების დაყენება უბრალოდ არარაციონალურია და ემსახურება მხოლოდ გაყიდვას რაციონალურ ნაბიჯად და რა თქმა უნდა, ეს შეგიძლიათ თქვენ შეაფასოთ, როგორც წითელი ხაზი", — თქვა მდინარაძემ.