განსხვავებული გამოცდილებისა და ხასიათის მქონე ადამიანების განსახიერება მარტივი საქმე ნამდვილად არაა, ამიტომ მსახიობები ხშირად კონკრეტული როლისთვის განსაკუთრებულად ემზადებიან. ისინი ცდილობენ, პერსონაჟების ცხოვრების სტილი, პროფესია თუ გარემო კარგად შეისწავლონ, რათა მათი შესრულება მაქსიმალურად ბუნებრივი იყოს.

მიუხედავად იმისა, რომ საკუთარი პერსონაჟების შესწავლის პროცესი ნებისმიერი მსახიობისთვის ჩვეულებრივი მოვლენაა, ზოგიერთი მათგანი ამისათვის წარმოუდგებელ ხერხებს მიმართავს. გთავაზობთ 10 შემთხვევას, როდესაც მსახიობები როლებისთვის მაქსიმალურად დაიხარჯნენ:

1. ჯეიმი ფოქსს რეი ჩარლზის როლისთვის თვალები 14 საათის განმავლობაში დაწებებული ჰქონდა

ფოტო: Universal Pictures

ფილმში Ray ლეგენდარული მუსიკოსის, რეი ჩარლზის როლის შესასრულებლად, მსახიობ ჯეი ფოქსს გადაღებებზე 14 საათის განმავლობაში თვალები დაწებებული ჰქონდა, რათა უსინათლო მუსიკოსი მაქსიმალურად ბუნებრივად განესახიერებინა. ეს მეთოდი მსახიობს ფილმის რეჟისორმა, ტეილორ ჰეკფორდმა შესთავაზა. ხშირად ჯეიმის კოლეგებს ავიწყდებოდათ, რომ მსახიობი ვერ ხედავდა და გადასაღებ მოედანზე გზის გასაკვლევად მარტოს ტოვებდნენ.

2. ტომ ჰოლანდმა 3 დღე სკოლაში გაატარა

ფოტო: Sony Pictures Releasing

იმისათვის, რომ ფილმში Spider-Man: Homecoming 15 წლის პიტერ პარკერის როლი ბუნებრივად შეესრულებინა, ტომ ჰოლანდმა სკოლის წლების გახსენება გადაწყვიტა. ამისათვის მსახიობი 3 დღის განმავლობაში სკოლაში ყალბი სახელითა და აქცენტით სწავლობდა. ჰოლანდმა აღნიშნა, რომ სკოლაში მიღებული გამოცდილება პიტერ პარკერის პიროვნების შექმნაში ძალიან დაეხმარა.

3. ჯოდი ფოსტერი FBI-ის აკადემიაში ჩაირიცხა

ფოტო: Orion Pictures

ჯოდი ფოსტერმა ფილმში The Silence Of The Lambs დეტექტივი კლარისის როლისთვის საუკეთესო ქალი მსახიობის ნომინაციაში ოსკარი მიიღო. ეს გასაკვირი სულაც არაა, თუ გავითვალისწინებთ იმ ფაქტს, რომ საკუთარი პერსონაჟის უკეთ გასაცნობად მსახიობი FBI-ის აკადემიაში ჩაირიცხა. აკადემიაში ფოსტერი ესწრებოდა წვრთნებს და სფეროს წარმომადგენლებთან აქტიური კომუნიკაცია ჰქონდა.

4. ედრიენ ბროუდიმ სახლზე და მანქანაზე თქვა უარი

ფოტო: Focus Features/StudioCanal

იმისათვის, რომ ფილმში The Pianist ჰოლოკოსტის მსხვერპლი პიანისტის როლი ბუნებრივად შეესრულებინა, ედრიენ ბროუდიმ უარი თქვა სახლსა და მანქანაზე, გაყიდა უამრავი ნივთი და ევროპაში ორი ჩანთით გაემგზავრა. ამ ყველაფერთან ერთად, ბროუდი მკაცრ დიეტაზეც იმყოფებოდა, რათა პერსონაჟის გასაჭირი საკუთარ თავზე გამოეცადა.

5. ნატალი პორტმანი ბალერინობას დღეში 8 საათს უთმობდა

ფოტო: Fox Searchlight Pictures

ნატალი პორტმანი ფილმისთვის Black Swan მაქსიმალურად დაიხარჯა: მსახიობი დღეში 8 საათის განმავლობაში ვარჯიშობდა. პორტმანი იმდენად მკაცრი რეჟიმით ცხოვრობდა, რომ ვარჯიშისას ნეკნიც კი იღრძო.

6. მარლონ ბრანდომ 1 თვე ვეტერანთა ჰოსპიტალის საწოლში გაატარა

ფოტო: IMDb

ფილმში The Men დაშავებული ლეიტენანტის როლის ბუნებრივად შესასრულებლად, მარლონ ბრანდომ 1 თვე იმ ჰოსპიტალში გაატარა, სადაც ფილმში მისი პერსონაჟი მკურნალობდა.

7. ჯონი დეპი ჰანტერ ტომპსონის სარდაფში ცხოვრობდა

ფოტო: Universal Pictures

ფილმისთვის Fear and Loathing in Las Vegas ჯონი დეპი ჟურნალისტსა და მწერალ ჰანტერ ტომპსონს წლების განმავლობაში სწავლობდა. მსახიობი ტომპსონთან ერთად სვამდა, მისი ძილის უჩვეულო რეჟიმიც აითვისა და ჟურნალისტის სარდაფში გადასახლდა, სადაც მის ნაწერებს კითხულობდა.

8. ჯიმ მორისონის პერსონაჟის განსახიერების გამო ველ კილმერს ფსიქოთერაპიის კურსი დასჭირდა

ფოტო: Tri-Star Pictures

ფილმში The Doors ამავე სახელწოდების როკ ჯგუფის ვოკალისტის, ჯიმ მორისონის როლის შემსრულებელმა ლეგენდარული მუსიკოსის ცხოვრება საფუძვლიანად შეისწავლა. მსახიობი მუსიკოსს საუბარში, სიმღერაში, ჩაცმის სტილსა და ქცევაში ბაძავდა. კილმერი როლში იმდენად შეიჭრა, რომ ჯგუფის სხვა წევრებს ხშირად უჭირდათ მუსიკოსისა და მსახიობის ჩანაწერებს შორის განსხვავების პოვნა. საბოლოოდ, მსახიობს ფსიქოთერაპიის კურსის გავლა დასჭირდა.

9. დენიელ დეი ლუისმა My Left Foot-ის გადაღებებზე მთელი დრო ეტლში გაატარა

ფოტო: Ferndale Films/Palace Pictures

ფილმში დენიელ დეი ლუისის პერსონაჟს ცერებრული დამბლა აქვს. იმისათვის, რომ როლი ბუნებრივად შეესრულებინა, მსახიობი კადრს მიღმაც ეტლით სარგებლობდა. გადაღებების დროს მან 2 ნეკნიც კი გაიტეხა.

10. ნიკ ნოლტი 5 კვირის განმავლობაში ქუჩაში ცხოვრობდა

ფოტო: Buena Vista Distribution

ფილმში Down and Out in Beverly Hills უსახლკარო ადამიანის როლის შესასრულებლად ნიკ ნოლტმა 5 კვირის ქუჩაში გატარება გადაწყვიტა. მეტი ეფექტისთვის, გადასაღებ მოედანზე არც ძაღლის საჭმლის დაგემოვნებაზე უთქვამს უარი.