ევროპული საქართველოს ლიდერის, გიგი უგულავას განცხადებით, იმედს იტოვებს, რომ პარტიის ყრილობამდე გიგა ბოკერია გადაიფიქრებს და პარტიულ თანამდებობაზე უარს იტყვის. მისი თქმით, ეს საჭიროა, რადგან პარტიის განახლებისთვის საჭიროა, რომ სამივე ლიდერი უნდა გადგეს გვერდზე.

"მე იმედი მაქვს, რომ საბოლოო ჯამში ჯანსაღი აზრი გაიმარჯვებს. მე იმედი, მაქვს იმიტომ, რომ ამ პარტიასთან მე დაკავშირებული მაქვს მთელი ჩემი ცხოვრების მნიშვნელოვანი ნაწილი. ამიტომ, ნამდვილად არ მინდა, რომ ეს პარტია განახლების გარეშე ჩარჩეს წარსულში. მე ნამდვილად გულწრფელად მინდა, რომ ეს პარტია განვითარდეს. ნამდვილად გულწრფელად ვთვლი, რომ მე უნდა გავიწიო. დათოც ამ შემთხვევაში არის აბსოლუტურად გულწრფელი და მე იმედს დავიტოვებ, ადრე თუ გვიან, ყრილობამდე ჯერ აქვს დრო, რომ ეს აზრი იქნება გიგას მხრიდანაც გაზირებული. იმიტომ, რომ სხვა შემთხვეავში პარტია შევა იმ ჩიხში, რომ მისი პერსპექტიული მიმზიდველობა დაიკარგება", — განაცხდა მან.

უგულავამ ხაზგასმით აღნიშნა, რომ პარტიის განახლებისთვის საჭირო იყო სამივე ლიდერი, მისი, დავით ბაქრაძისა და გიგა ბოკერიას "გვერდზე გაწევა".

"მე ვთვლი, რომ პარტიას სჭირდება განახლება. განახლებისთვის მინიმუმ აუცილებელი პირობაა, სამივე ჩვენთაგანის პარტიის მართვისგან გვერდზე გაწევა. ეს მიმაჩნია მე პირველ, ფუნდამენტურ, აუცილებელ, შეიძლება არასაკმარის, მაგრამ აუცილებელ წინაპირობად იმისთვის, რომ პარტია განახლდეს, ახალი შენაკადები შეიძინოს, შევიდეს სხვადასხვა კოალიციურ ურთიერთობებში. აქვე ვიტყვი, რომ ჩემი პერსონალური გადაწყვეტილება ნაკარნახევია იმით, რომ მე არანაირი ამბიცია და პრეტენზია არ მაქვს პოსტბიძინურ ეპოქაში რაიმე თანამდებობაზე. ჩემი ბრძოლა არის, მხოლოდ და ხმოლოდ ივანიშვილის რეჟიმის წინააღმდეგ", — განაცხადა მან.

მისი თქმით, "ფუნდამენტურად არასწორად" მიაჩნია გიგა ბოკერიას გადაწყვეტილება პარტიაში თანამდებობის შენარჩუნების შესახებ. მისი თქმით, არ არსებობენ პარტიის ლიდერები უპირობოდ და უვადოდ და თუ ყველა თანასწორია, ვიღაც უფრო თანასწორი ვერ იქნება.