ილონ მასკი ამბობს, რომ მის სტარტაპს Neuralink ჰყავს მაიმუნი, რომლის ტვინშიც ნეირონული ინტერფეისია მოთავსებული და ის გონებით ვიდეოთამაშებს ართმევს თავს.

"ის ბედნიერი მაიმუნია", — თქვა მასკმა, რომელიც Tesla-სა და SpaceX-ის აღმასრულებელი დირექტორი და უამრავი ფუტურისტული იდეის ავტორია. მათ შორისაა Neuralink — სტარტაპი, რომელიც ტვინი-კომპიუტერი ინტერფეისის შექმნაზე მუშაობს. მისი თქმით, ნეირონულ ინტერფეისიანი მაიმუნის ამსახველ ვიდეოს კომპანია მალე გაავრცელებს.

მასკმა აღნიშნულის შესახებ Clubhouse-ში ისაუბრა — სოციალურ აპლიკაციაში, სადაც მომხმარებლები სხვადასხვა საუბრებს მართავენ ხოლმე. სხვათა შორის, ეს არის პლატფორმა, რომელიც აუდიო კონფერენციებს უზრუნველყოფს და დაახლოებით, 10 დღის წინ, 3 მილიონი მომხმარებლიდან 5 მილიონამდე ძალიან სწრაფად ავიდა.

"ჩვენ გვყავს მაიმუნი, რომელსაც თავის ქალაში ინტეგრირებული აქვს უსადენო იმპლანტი, რომელიც ტვინს წვრილი სადენებით უკავშირდება და მას ვიდეოთამაშების თამაში გონებით შეუძლია", — განუცხადა მასკმა რამდენიმე ათასი ადამიანისგან შემდგარ აუდიტორიას, Clubhouse-ზე ჩართვისას. "თქვენ არ შეგიძლიათ ნახოთ, თუ სადაა იმპლანტი და ის ბედნიერი მაიმუნია. ჩვენ გვაქვს ყველაზე კარგი პირობები მაიმუნებისთვის მთელ მსოფლიოში. გვინდა მათ ერთმანეთთან გონებით თამაში შეძლონ", — დასძინა მასკმა.

მასკის აუდიოჩართვის სრული ვერსიის მოსმენა ქვემოთ მოცემულ ჩანაწერში შეგიძლიათ.

ამავე თემაზე: