სასაზღვრო პოლიციის ყოფილი უფროსის, ბადრი ბიწაძის განცხადებით, კარტოგრაფების საქმეზე დაკავებული ივერი მელაშვილისა და ნატალია ილიჩოვას საქმე არსაითკენ არ მიდის. როგორც მან ფორმულას ეთერში აღნიშნა, ეს ჰგავს "ავანტიურას", რომელიც სახელმწიფოს დააზიანებს.

"მე არ ვიცი სისხლის სამართლის საქმის დეტალები, მაგრამ როგორც პროფესიონალი, როგორც მოქალაქე, როგორც ვუყურებ ამას, ეს საქმე არსაითკენ არ მიდის. ეს არის წმინდა პოლიტიკური საქმე და დარწმუნებული ვარ, რომ ეს ხალხი საერთოდ უდანაშაულოდაა დაკავებული", — აღნიშნა ბიწაძემ.

კარტოგრაფების საქმესთან დაკავშირებით ბადრი ბიწაძე დღეს პროკურატურაში გამოკითხეს. ბიწაძის თქმით, ის საზღვრის დადგენის კომისიაში არ ყოფილა. როგორც იგი განმარტავს, კითხვები ძირითადად შეეხებოდა იმას, ვინმე ზემდგომი პირი ხომ არ ავალებდა მათ უკანონო ქმედებების ჩადენას, ამასთან, ამ ზემდგომის პირების კონკრეტული გვარები არ დასახელებულა.

"მე არავითარი პრეტენზია გამოძიების მიმართ არ მაქვს, რადგან გამოკითხვა ჩვეულებრივად ჩატარდა. რა თქმა უნდა ზოგიერთი კითხვა მეც ვერ გავიგე, რადგან ისეთი კითხვა იყო... მაგრამ მიუხედავად ამისა, ჩვეულებრივი გამოკითხვა იყო, პრეტენზია არ მაქვს. თუ კიდევ გამომიძახებენ, ისევ მივალ. მაგრამ საქმე არ მიდის არსაითკენ. ეს ჰგავს ავანტიურას, რომელიც ჩვენს სახელმწიფოს აუცილებლად დააზიანებს", — აღნიშნავს ბიწაძე.

დღეს, 21 იანვარს პროკურატურამ ივერი მელაშვილის კაბინეტში ფარულად გადაღებული ვიდეომასალა გამოაქვეყნა, სადაც ბრალდებულისა და კიდევ ერთი პირის საუბარია აღბეჭდილი. პროკურორ ამირან გულუაშვილის მტკიცებით, ფარულ ჩანაწერებში ბრალდებული ივერი მელაშვილი ადასტურებს, რომ 2006 წლის აგვისტოს შეთანხმებისას დავით გარეჯის მიმდებარედ ქართულმა მხარემ საქართველოს თავდაპირველი პოზიცია უარყო.