ნათქვამია, აირჩიე საქმე, რომელიც გიყვარს და ცხოვრებაში არასდროს მოგიწევს მუშაობაო, თუმცა, ადამიანების უმეტესობისთვის საოცნებო სამსახური მართლაც ოცნებად რჩება. საინტერესოა, როგორ შეგვიძლია საყვარელი საქმე, მაგალითად ჰობი, სრულ-განაკვეთიან პროფესიად ვაქციოთ? CNN-მა ხუთ ადამიანს, რომელმაც საყვარელი საქმე შემოსავლის წყაროდ აქცია, ჰკითხა, საიდან უნდა დავიწყოთ, რომ წარმატებას მივაღწიოთ.

1. გამოიმუშავე უნარები

ფოტო: CNN

ანა ჯეინ გროსმანი New York Times-ში ფრილანსერ ჟურნალისტად მუშაობდა. მას ძაღლები უყვარდა და მათი გაწვრთნაც ეხერხებოდა. 2008 წელს, როცა გლობალურმა ფინანსურმა კრიზისმა ჟურნალ-გაზეთების ბიუჯეტზე არცთუ სახარბიელოდ იმოქმედა, ანა მიხვდა, რომ დრო იყო, თავისი ცხოვრებისეული მისწრაფება რეალობად ექცია და ძაღლების მწვრთნელი გამხდარიყო.

გროსმანი ამბობს, რომ ახალ კარიერაში წარმატების მისაღწევად ყველაზე მნიშვნელოვანი ნაბიჯი მისთვის 6-თვიანი ტრენინგ-კურსის გავლა იყო. ეს მას სწორი მიმართულების განსაზღვრაში დაეხმარა.

"მართლა არაფერი ვიცოდი სანამ კურსს დავიწყებდი. ძალიან გამიმართლა, რომ ეს პროგრამა ვიპოვე", — ამბობს ის CNN-თან საუბარში და ამატებს, რომ როგორც კი კურსი დაიწყო, მიხვდა, ცხოვრებაში რა უნდა ეკეთებინა. "ამის შემდეგ ყველაფერი მწყობრში ჩადგა", — აღნიშნავს ანა.

ანამ School of the Dogs (ძაღლების სკოლა) დააფუძნა, სადაც თავის ფუმფულაბეწვიან "მოსწავლეებს" სხვადასხვა რამეს, მათ შორის iPad-ის გამოყენებას ასწავლის.

2. შეამჩნიე პოტენციალი

ფოტო: CNN

ჯერალდო დე-სუზა თვალისმომჭრელ ჰალსტუხ-პეპლებს ქმნის, თუმცა მან ცხოვრების 20 წელი სადაზღვევო საქმიანობას დაუთმო. არასდროს უფიქრია, რომ ჰობს შემოსავლის წყაროდ აქცევდა მანამ, სანამ მისმა ცოლმა არ შენიშნა, როგორ აჩერებდნენ ქუჩაში ჯერალდოს და სთხოვდნენ, ის პეპელა მიეყიდა, რომელიც თავად ეკეთა.

"არასდროს მიფიქრია, რომ ჩემს ჰობს პოტენციალი ჰქონდა, სანამ ჩემმა ცოლმა არ მითხრა, — ათ ადამიანს მაინც ვიცნობ, ვინც შენი ჰალსტუხი-პეპელა იყიდა. იცი, შეიძლება ამისგან კარგი კარიერა შეიქმნაო", — ამბობს ჯერალდო.

3. გაყიდე პროდუქტი

ფოტო: CNN

ბეატრის ცანგი ლოსანჯელესელი მსახიობი იყო. მას ტკბილეულობის გამოცხობა უყვარდა. ერთხელაც კი ეს ჰობი ნამდვილ საქმედ გადააქცია. ცანგის Baby Bea's საცხობი ბევერლი ჰილსში მდებარეობს და სელებრითებს ტკბილეულით ამარაგებს.

"მეგობრებისთვის საჩვენებლად ინტერნეტში ჩემი ტკბილეულის ფოტოებს ვტვირთავდი. მათ კი შეკვეთების დადება დაიწყეს. მივხვდი, რომ ჩემი პროდუქტები ბაზარზე მოთხოვნადი შეიძლება ყოფილიყო. ასე შევქმენი ვებსაიტი, რომლის დახმარებით მეტი და მეტი შეკვეთა მივიღე. შეკვეთების რაოდენობა კიდევ უფრო გაიზარდა როცა Yelp-ზე ჩემი გვერდი გავაკეთე. რეფერალებისა და ონლაინ მარკეტინგის დახმარებით ქალაქში ყველაზე კარგი რეპუტაციის მქონე საცხობი ჩამოვაყალიბეთ", — ყვება ბეატრისი.

4. არ გაუშვა ხელიდან შესაძლებლობა

ფოტო: 6sqft

ჯენი დუნდასი 9 წლის ასაკიდან მსახიობობას მისდევდა. ის ისეთ ცნობილ სერიალებშიც კი გადაიღეს, როგორებიცაა სასოწარკვეთილი დიასახლისები და კანონი და წესრიგი.

ერთხელაც ჯენის მეგობარი, რომელიც შემდგომში მისი ბიზნესპარტნიორი გახდა, ბრუკლინში გადავიდა და შეამჩნია, რომ მიმდებარედ ბევრი ახალგაზრდა ოჯახი ცხოვრობდა. მათ ამაში ბიზნეს-შესაძლებლობა დაინახეს. მეგობარმა ჯენის უთხრა, მგონი სანაყინე უნდა გავხსნათო, ყოფილი მსახიობი კი ყველაფერზე თანახმა იყო, რაც ნაყინთან დაკავშირებული იქნებოდა. ასე გახსნა წყვილმა სანაყინე Blue Marble, რომლის ფილიალებს ნიუ-იორკსა და მასაჩუსეტსში რამდენიმე ადგილას შეხვდებით.

5. უბრალოდ გააკეთე

ფოტო: CNN

იურისტი მარჯორი ლიუ რომანის დაწერაზე ყოველთვის ოცნებობდა. საკვალიფიკაციო გამოცდის ჩაბარების შემდეგ მას ამ ოცნების ასრულებაზე ფიქრი აეკვიატა. ერთი თვის განმავლობაში სახლიდან არ გამოსულა, დღეში 14 საათი წერდა. ასე შექმნა პირველი წიგნი ვეფხვის თვალი — თრილერი პარანორმალურ მოვლენების შესახებ.

დებიუტიდან ცხრა წლის შემდეგ ლიუ New York Times-ის ბესთსელერი ავტორია და 17 ნოველასთან ერთად X ადამიანების კომიქსის რამდენიმე გამოცემა აქვს დაწერილი. "მე ვოცნებობდი. იმისა მიუხედავად, რომ ყველა მეუბნებოდა, რაოდენ არაპრაქტიკული ოცნებები მქონდა, გულის სიღრმეში ყოველთვის ვიცოდი, რომ ეს უნდა მეკეთებინა. თუნდაც არ გამომსვლოდა, მე უნდა მეცადა", — ამბობს ლიუ.

მართვისა და კომუნიკაციების სასწავლო უნივერსიტეტი ალტერბრიჯი აბიტურიენტებსა და მაგისტრანტებს სთავაზობს საბაკალავრო და სამაგისტრო პროგრამებს კომუნიკაციების მართვის მიმართულებით. ადგილობრივი და საერთაშორისო პროფესიონალი სპიკერები და პროფესორები; სტუდენტზე მორგებული სწავლების განსხვავებული მეთოდი; ეკოლოგიურად სუფთა გარემოში ორიგინალური დიზაინის მქონე შენობა და, რაც მთავარია, დასაქმების რეალური შანსი ქვეყნის წამყვან კომპანიებში — ამ და სხვა შესაძლებლობებს ალტერბრიჯი გთავაზობთ.