ამბავი, რომელიც კანადელ მელისა ბენუას გადახდა, აქამდე მხოლოდ სამეცნიერო ფანტასტიკაში თუ გექნებათ წაკითხული. 33 წლის ქალს რამდენიმე თვის წინ უმძიმესი და ურთულესი ოპერაციის გადატანა მოუწია, რის შემდეგაც მან 6 დღის განმავლობაში ფილტვების გარეშე იცოცხლა.

2016 წლის აპრილში მელისა ტორონტოს საავადმყოფოში ფილტვის მწვავე ინფექციის დიაგნოზით მიიყვანეს. ბოლო სამი წლის განმავლობაში ქალი, რომელსაც კისტური ფიბროზი ჰქონდა, გახშირებული ინფექციების გამო ანტიბიოტიკებს იღებდა. გრიპის ვირუსმა მელისას სუნთქვა გაუძნელა და მას იმდენად ძლიერად ახველებდა, რომ ნეკნებიც კი გაებზარა.

ფილტვებში არსებულმა ბაქტერიამ ყველა ანტიბიოტიკის მიმართ გამოამჟღავნა იმუნიტეტი, ასე რომ, პაციენტის გადარჩენა მხოლოდ ფილტვის ტრანსპლანტაციით იყო შესაძლებელი. ამ დროს ექიმებმა რადიკალურ გზებზე დაიწყეს ფიქრი - ინფექციის წყაროს, ანუ ფილტვების ამოჭრის შემთხვევაში მელისას ტრანსპლანტაციის ოპერაციამდე მიღწევის შანსი უჩნდებოდა, სხვანაირად კი მისთვის სიცოცხლის შენარჩუნება ვერ მოხერხდებოდა.

ამ პროცედურის კონცეპტზე ექიმები უკვე დიდი ხანი ფიქრობდნენ, მაგრამ საქმე აქამდე არასოდეს მისულა. ოპერაცია 9 საათის განმავლობაში გაგრძელდა და მისი დასრულებისთანავე მელისას მდგომარეობა საგრძნობლად გაუმჯობესდა.

მომდევნო 6 დღის განმავლობაში პაციენტის გული ორ გარე აპარატზე იყო შეერთებული, ხოლო ჟანგბადის სისხლისთვის მოწოდება Novalung-ის ხელოვნური ფილტვით ხდებოდა. ტრანსპლანტაციის ოპერაციამ წარმატებით ჩაიარა და მელისა სახლში ჯანმრთელი დაბრუნდა.