ევროპული საქართველოს ერთ-ერთი ლიდერის, გიგი უგულავას განცხადებით, ქართული ოცნების აღმასრულებელი მდივანი, ირაკლი კობახიძე მატყუარაა. უგულავას თქმით, ქართული ოცნება ინდივიდუალურ მოლაპარაკებებს აწარმოებს მოქალაქეების ლიდერთან, ალეკო ელისაშვილთან და გირჩის მეორე ფრთასთან, ანუ გირჩი 2-თან.

"კობახიძე არის მატყუარა, კობახიძე იტყუება. მარტივად შეგვიძლია ჩამოვთვალოთ და მე პირდაპირ გეტყვით, ვისაც ელაპარაკებიან. ელაპარაკებიან ელისაშვილს და გირჩის მეორე ფრთას, ანუ გირჩი 2-ს. შესაბამისად, ეს ხალხი დადის რაღაცა წინადადებით, ოღონდ ყველასგან მიიღო პასუხი, რომ ოპზიციის ერთობას პირველი დღიდან აქვს მკაფიო, გამოკვეთილი, საზოგადოებასთან შეჯერებული პოზიცია. ეს არის რიგგარეშე არჩევნები, პოლიტპატიმრების გათავისუფლება და სააჩევნო რეფორმა", — განაცხადა უგულავამ რუსთავი 2-ის ეთერში.

ქართული ოცნების აღმასრულებელმა მდივანმა, ირაკლი კობახიძემ გუშინ, ღამის კურიერის ეთერში განაცხადა, რომ ოპოზიციური პარტიების უმრავლესობასთან ფასილიტატორი ელჩების გარეშეც ჰქონდათ კომუნიკაცია.

"მე შემიძლია გითხრათ, რომ ამ პარტიების უმრავლესობასთან სხვადასხვა ტიპის კომუნიკაცია შედგა [...] ეს კომუნიკაცია შედგა უმრავლესობასთან ამ პარტიების, ანუ, უმრავლესობა არის მინიმუმ ხუთი რვიდან", — განაცხადა ირაკლი კობახიძემ.

კობახიძის თქმით, ინდივიდუალური მოლაპარაკებების გამართვა მმართველ პარტიასა და ცალკეულ ოპოზიციურ პარტიებს შორის საერთაშორისო პარტნიორების მოწოდებაც იყო.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.