ქართული ოცნების დეპუტატმა, ბეჟან წაქაცემ პარლამენტში ბიუჟეტის განხილვის სხდომაზე იმედი გამოთქვა, რომ საქართველოს "უფალი გადმოხედავს" და ქვეყანაში ტურიზმიც მალე აღდგება. მან ხაზი გაუსვა იმასაც, რომ მომავალ წელს ერთ-ერთი ყველაზე მნიშვნელოვანი სწორედ ის იქნება, რომ ეს სექტორი სწრაფად დაბრუნდეს.

"გამოჩნდა, რომ ბიზნესში, ჩვენს ეკონომიკურ პარამეტრებში, გასული წლების განმავლობაში ძალიან დიდი მნიშვნელობა ჰქონდა ტურიზმს. ამიტომ, სწრაფად აღდგენადი ქვეყანაში ამ პერიოდში, იქნება ტურიზმი. თუ რამე იქნება ამ მიმართულებით გაკეთებული, რომ ტურიზმზე, რომელსაც ველოდები და იმედია, რომ უფალი გადმოგვხედავს და მალე გაიხსნება ჩვენთან ეს მიმართულება, რითი შეიძლება დავეხმაროთ ამ სექტორს?", — განაცხადა მან.

დღეს პარლამენტში საქართველოს 2021 წლის ბიუჯეტის განხილვა მიმდინარეობს. მე-10 მოწვევის პარლამენტმა ოფიციალურად მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროექტს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.