საქართველოს ახალგაზრდა იურისტთა ასოციაციაში აცხადებენ, რომ პოლიტიკური პროტესტის გამო პარტიებისთვის სახელმწიფო დაფინანსების შეწყვეტის მიზანი ოპოზიციის დასჯაა.

"პარტიების სახელმწიფო ბიუჯეტიდან დაფინანსება, პირველ რიგში, ემსახურება პარტიების ქმედითუნარიანობის უზრუნველყოფას. ის არ ემსახურება მხოლოდ პარტიის საპარლამენტო საქმიანობის ხელშეწყობას. პოლიტიკურ პარტიებსა და კანდიდატებს სჭირდებათ ფულად სახსრებზე წვდომა, რათა ამომრჩევლამდე მიიტანონ თავიანთი მიზნები და ხედვა პოლიტიკის შესახებ, და ამავე დროს მიიღონ ხალხის შეხედულებების თაობაზე ინფორმაცია", — აცხადებენ ორგანიზაციაში.

საია მოუწოდებს პარლამენტს მხედველობაში მიიღოს პარტიათა სახელმწიფო დაფინანსების მიზნები, დანიშნულება, არ დაუშვას პოლიტიკური პარტიების არაპროპორციულად შემზღუდველი, დაუსაბუთებელი ნორმების გაჩენა კანონმდებლობაში და წარმოდგენილი კანონპროექტი არ მიიღოს.

კანონპროექტს გამოეხმაურა ამერიკის ელჩი საქართველოში. კელი დეგნანმა განაცხადა, რომ არ ეთანხმება კანონპროექტს, რომელიც ოპოზიციური პარტიის საარჩევნო რეგისტრაციიდან მოხსნასა და პარტიების დაფინანსების შეწყვეტას გულისხმობს. აშშ-ის ელჩი იმედს გამოთქვამს, რომ მმართველი პარტიის მიერ ინიცირებული კანონპროექტი გადაიხედება.

ქართულმა ოცნებამ პირველი მოსმენით მიიღო კანონპროექტი, რომელიც პარლამენტში არშესულ პარტიებს დაფინანსებას შეუწყვეტს.

აღნიშნულ ცვლილებებს იურიდიულ საკითხთა კომიტეტის თავმჯდომარემ, ანრი ოხანაშვილმა "სამართლიანი და დემოკრატიული" წესი უწოდა. მან ხაზგასით აღნიშნა, რომ ეს ცვლილება ეხება არა პოლიტიკურ ბოიკოტში მყოფ პარტიებს, რაც საპარლმენტო საქმიანობის ნაწილია, არამედ საბოტაჟსა და პარლამენტში შესვლაზე უარის თქმას.

მმართველი პარტიის აღმასრულებელმა მდივანმა, ირაკლი კობახიძემ განაცხადა, რომ პარტიას აქვს ინიციატივა შეაჩერონ კანონპროექტის განხილვა და ეუთო/ოდირსა და ვენეციის კომისიას გადაუგზავნონ.

პარლამენტმა პირველი მოსმენით, ასევე, მიიღო ცვლილებები საარჩევნო კოდექსი, რომლის თანახმად, იგივე პარტიები მუნიციპალური და საპარლამენტო არჩევნებისთვის განკუთვნილი უფასო საეთერო დროით ვერ ისარგებლებენ. საკითხს კენჭისყრაზე 82 მომხრე და არცერთი წინააღმდეგი ჰყავდა.

ოპოზიციური პარტიები, რომლებმაც ცესკოს მონაცემებით ბარიერი გადალახეს ბოიკოტის რეჟიმში არიან და პარლამენტში შესვლაზე უარს ამბობენ, ამიტომ პარლამენტი ერთპარტიულია და მხოლოდ ქართული ოცნების დეპუტატებითაა დაკომპლექტებული. პარტიების უმეტესობამ მანდატებზე უარი თქვა და საპარლამენტო სიებიც ჩახსნა. დანარჩენები კი ფასილიტატორების ჩართულობით მმართველ გუნდთან მოლაპარაკებებს ელოდებიან და მხოლოდ ამის შემდეგ აპირებენ მანდატებზე უარის თქმას ან პარლამენტში შესვლას.