გირჩის ლიდერის, ზურაბ ჯაფარიძის აზრით, პარტიების დაფინანსების პროექტის შეჩერება ქართული ოცნების მხრიდან ერთგვარი უკან დახევაა. თუმცა, მისივე თქმით, ამით ინიციატივის დაყენების არსი არ იცვლება.

როგორც მან TV პირველის ეთერში განაცხადა, ქართული ოცნება ასეთი ტიპის ინიციატივით ცდილობს დააშანტაჟოს ოპოზიციური სპექტრი, რომელიც საბიუჯეტო დაფინანსებაზე დამოკიდებული და ამით აშანტაჟებს.

"ერთგვარი უკან დახევა არის, ალბათ, რადგან შეაჩერეს და ვენეციის კომისიის დასკვნას დაელოდებიან, თუმცა ამით თვითონ ამ ინიციატივების დაყენების არსი ხომ არ იცვლება. აქ საუბარი არაა იმაზე რამდენად სწორია პარტიების დაფინანსების წესი. ჩემი აზრით, ფუნდამენტურად არასწორია და ეგ წესი გასაუქმებელია და პარტიები საკუთარი მხარდამჭერებიდან უნდა იღებდნენ დაფინანსებას", — აღნიშნა ჯაფარიძემ.

ქართული ოცნება გამოდის ინიციატივით, რომ პარტიების დაფინანსებისა და საარჩევნო რეგისტრაციის გაუქმების შესახებ ცვლილებები ოდირს და ვენეციის კომისიას გადაეგზავნოს. ამის შესახებ პარლამენტის პლენარულ სხდომაზე საპარლამენტო უმრავლესობის ლიდერმა, ირაკლი კობახიძემ განაცხადა.

კობახიძის განმარტებით, პროექტის განხილვა იანვრის ბოლომდე შეჩერდება და მასზე მუშაობა ვენეციის კომისიისა და ეუთო/ოდირის პოზიციების შემდეგ გაგრძელდება. აღნიშნულ კანონრპროექტებს ქართულმა ოცნებამ პირველი მოსმენით მხარი უკვე დაუჭირა.

ოფიციალურად პარლამენტმა მუშაობა 11 დეკემბერს დაიწყო. ამის პარალელურად, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. ამასთან, მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.