დაავადებათა კონტროლის ცენტრის დირექტორის, ამირან გამყრელიძის განცხადებით, ინფექციური საავადმყოფოს დირექტორს, თენგიზ ცერცვაძეს არ აქვს ზუსტი ინფორმაცია და ქვეყანაში Pfizer-ის ვაქცინის შესანახი მაცივრები არის. მისივე თქმით, ამ ვაქცინისთვის საჭირო -80°C-იანი ცივი ჯაჭვის უზრუნველყოფა შესაძლებელია.

"ნამდვილად ავიღებთ თუ მოხერხდა, რომ Pfizer-ის ვაქცინა ხელმისაწვდომი გახდა ჩვენთვის და რომელიმე დიდმა ქვეყანამ გარკვეული დოზები საქართველოს მისცა. გაძლევთ გარანტიას, რომ ნამდვილად ავიღებთ. [...]

-80-ზე არის ის, რომ ეს რთულია, ეს პირველად ხდება ასეთი ფართო მასშტაბის ცივი ჯაჭვის გამართვა. ჩვენ ახლა გვაქვს ქვეყანაში 40-მდე -80-იანი მაცივარი. ძირითადად ეს არის დაავადებათა კონტროლია ცენტრში, რომლებიც დღეს სხვა მიზნით გამოიყენება", — განაცხადა მან გადაცემა პოლიტმეტრში.

მისი განმარტებით, არსებულიდან 6 მაცივარი უკვე გამოთავისუფლებულია და ის 300 000 დოზა Pfizer-ის ვაქცინას დაიტევს. გამყრელიძის თქმით, ეს მაცივრები თბილისში, ქუთაისსა და ბათუმშია.

21 დეკემბერს თბილისის ინფექციური საავადმყოფოს დირექტორმა, თენგიზ ცერცვაძემ განაცხადა, რომ სავარაუდოდ Pfizer-ის ვაქცინას საქართველო არ შეისყიდის, რადგან მისი შენახვის შესაძლებლობა ქვეყანას არ აქვს. ცერცვაძემ აღნიშნა, რომ საქართველოსთვის უფრო სასურველი მოდერნას ვაქცინაა, რადგან მას -20°C-იანი მაცივარი სჭირდება.